Aliansa Patriótiko ta un echo i tei pa keda!!!

Dia 12 di febrüari ta un fecha ku lo keda marká den historia pasombra riba e fecha aki a formalisá e organisashon ku a lanta pa:

1. salbaguardiá e derechi di autodeterminashon ankrá den diferente resolushonnan di Nashonnan Uní
2. realisá un Kòrsou outónomo den Reino konforme deseo di nos pueblo den e referendum di 8 di april 2005 i kual lo ta minimalmente igual na e loke ta den Statuto di reino Hulandes pa pais Antias i pais Aruba
3. kontinuá desaroyo i emansipashon di e pueblo di Kòrsou

Aliansa Patriótiko lo logra su metanan dor di konsientisá nos pueblo pa medio di informashon riba nos derechi i debernan síviko i polítiko. Organisando protesta bou di pueblo di Kòrsou kontra kualke forma di rekolonisashon i mishimentu ku nos derechi di outodeterminashon nos lo defende i stimula nos kultura i nos idioma.

Alabes Aliansa ke krea sosten internashonal pa nos lucha i e defensa di e derechi di pueblo di Korsòu pa posehé liber riba nos rikesanan natural konforme artilulo 2 di akuerdonan internashonal enkuanto e “Akuerdo di derechinan Ekonomiko, Sosial i Kultural” i “Akuerdo Internashonal enkuanto derechinan Sivil i Politiko”.

Tambe lo sostene i inisia aktividatnan patriótiko i hasiendo uso di nos derechi di

manifestashon pasífiko lo sigui ku e lucha pa un Kòrsou pará stabil riba pia. .

Por último direktiva di Aliansa Patriótiko ke felisitá tur su miembronan i pueblo di Kòrsou ku un organisashon fuerte ku tei pa keda!

Esaki ta logo di ALiansa Patriótiko:

Direktiva di Aliansa Patriótiko