Aliansa Patriótiko

Eksitoso fundraising pa Kumbre Internashonal 2010

Den kuadro di e kumbre internashonal, titulá ‘Di Outonomia Real pa Soberania’ ku ta  tuma lugá yanüari próksimo, Aliansa Patriótiko tabatin un aktividat di fundraising eksitoso siman pasá djabièrnè na El Rincon Cubano na Muizenberg. Tabata un cocktail informativo masha ameno kaminda tres persona a hiba palabra.

Presidente di Fundashon Kòrsou Fuerte i Outónomo, Sr. Elmer (Kadè) Wilsoe a trese dilanti ku nan organisashon ta lucha pa kumpli ku deseo di pueblo di Kòrsou pa logra un Kòrsou Outónomo manera ekspresá den referèndem di aña 2005. Loke awor aki tin riba mesa definitivamente no ta kumpli ku esaki. Komo tal nan organisashon ta sostené Aliansa Patriotiko den nan lucha pa reskatá nos derechi di outodeterminashon i ta koperá ku e kumbre internashonal  di yanüari benidero.

Otro invitado ku tambe a hiba palabra ta Rudy Croes di Aruba, ku ademas di ta èks minister di hustisia ta vise presidente di e organisashon regional di partidonan sosial demokrat  COPPPAL.El a enfatisá ku islanan Aruba, Boneiru i Kòrsou mester traha huntu pa enfrentá e enemigu komun, ku ke kita nos derechi di outodeterminashon i nos outonomia lográ den pasado.E ta spera ku e gobièrnunan aktual lo no koperá ku Hulanda den esaki.

Komo visepresidente di Aliansa Patriótiko Errol Cova a profundisá un biaha mas kiko ta outodeterminashon, ku ta un derecho inalienabel, ku mester di apoyo internashonal. Komo tal ta konkretá e apoyo aki organisando e kumbre internashonal na yanüari ku ta konta ku oradónan internashonal.

Pa duna mas informashon riba meta, kontenido i organishon di e kumbre ‘Di Outonomia Real pa Soberania’ Aliansa Patriótiko a organisá un konferensha di prensa pa djamars awor 17 di novèmber 3.00 p.m.

Athuntu algun foto di e cocktail informativo eksitoso