Komunikado

MIENTRAS NOCHI N’ SERA,  KAREDA DI BINÁ NO A KABA

Kòrsou ta pará na un punto krusial den su desaroyo.

Analisando situashon aktual, nos tur por realisá ku nétamente loke Nashonnan Uní pa medio di resolushon 2625 i 1514 kera evitá, ta sosodiendo den nos pais i ku nos pueblo. Ulanda ku ta e pais kolonisadó ta uza i chantagiá ku plaka pa asina kumpra esnan ku ta dispuesto pa koperá ku su plan makabre di sigui dominá i rekolonisá nos pueblo i otro islanan di Antia i tambe Aruba.

Saliendo for di e situashon aki i mirando kiko a pasa durante último referèndum Aliansa Patriótiko ta di opinion ku mester kontinuá na un manera aselerá i muchu mas fuerte ku e ruta regional/internashonal di e lucha.

Den e kuadro aki a disidí di organisá un kumbre internashonal na yanüari 2010 ku sosten i den koperashon estrecho ku Fundashon Kòrsou Fuerte i Outónomo i Fundashon Desaroyo Popular.

E kumbre ta hiba komo título: ‘DI OUTONOMIA REAL PA SOBERANIA’, enfatisando ku loke awor aki e gobièrnunan aktual ta bende komo outonomia ta un farse i ku outonomia real  ta un fase den e proseso di nos emansipashon.

Durante di e kumbre lo analisá e konsepto outodeterminashon den proseso di emansipashon di pueblo; lo analisá nos realidat den relashon ku e konseptonan presentá, lo analisá e aspekto geopolítiko i posibel strategianan di lucha i lo tin ehèmpel bibu di lucha similar na nivel regional/internashonal.

Pa medio di e kumbre aki ku proyekshon regional/internashonal Aliansa Patriótiko ke motivá i fortifiká e espíritu di lucha  bou di nos pueblo en partikular, determinando un etapa nobo den nos lucha pa derechi di outodeterminashon, nos demokrasia i e proseso di emansipashon i di nos pueblo.

A invitá oradónan internashonal komo representante di paisnan liber di region di Karibe i  Amérika Latino, ku tin konosementu i eksperensha di e tema aki i ku por enrikesé nos pensamentu pa loke ta kontinuashon di e lucha di prinsipio aki. Tambe lo tin oradó lokal pa deskribí konteksto di e lucha aki na nivel lokal, pa asina tin koherensha den e aspekto lokal, regional i internashonal.

Resultado di e kumbre, ku lo ta ankrá den un dokumentu, lo ta klave pa inisio di e etapa nobo di nos lucha. Apoyo popular lokal i sosten regional/internashonal  ta base pa intensifiká nos lucha riba plataforma regional/internashonal.

E representantenan internashonal ku lo hiba palabra durante di nos kumbre ta:

Sr. Gustavo Carvajal    presidente athunto di COPPPAL prosedente di Mexico

Sr. Fernando Martin    eksperto di proseso di outodeterminashon prosedente di Puerto Rico

Sra. Piedad Córdoba   senador/nominado premio Nobel di Pas 2009 prosedente di Colombia

E kumbre ta tuma lugá na W.T.C. riba dianan:

Djabièrnè 15 di yanüari, djasabra 16 di yanüari i djadumingu 17 di yanüari 2010

Registrashon ta kosta fl. 20,00

Pa motibunan organisatorio ta supliká pa inskribí mas pronto posibel na numbernan:

511-4032 / 520-3458 òf via mail aliansa.patriótiko@gmail.com

PROGRAMA PROVISORIO DI KUMBRE INTERNASHONAL 2010

‘DI OUTONOMIA REAL PA SOBERANIA’

Djabièrnè 15 di yanüari

7.00 p.m. – 9.00 p.m.          - Apertura i introdukshon di oradónan internashonal i lokal

- Ora sosial

Djasabra 16 di yanüari

9.00 a.m. – 4.00 p.m.            - Presentashon di representante di Fundashon Kòrsou Fuerte                                                       i Outónomo

- Presentashon  di oradónan internashonal

- Diskushon ku pènel

Djadumingu 17 di novèmber

9.00 a.m. – 12.30 p.m.          - Presentashon di oradó internashonal

- Vishon i mishon di Aliansa Patriótiko

- Presentashon di resolushon final

- Klousura

Ta entregá e programa definitivo despues di inskripshon