Aliansa Patriótiko

Bestuurlijkoverleg ku Ulanda ta un trampa

Djamars awor pa 5or di atardi Aliansa Patriótiko lo ta na lusnan di tráfiko na Sta.Maria pa akshoná kontra e trampa ku Ulanda tin prepará pa nos i ku djarason awor 30 di sèptèmber 2009 nos gobièrnunan tin pensá di kai aden.

Manera nos a bisa den nos último karta habrí, dirgí na parlamento di Antia i Konseho insular di Kòrsou, ta intenshon pa Ulanda hasi Antia i Kòrsou komplisé di un lei diskriminatorio ku ta violá derechonan fundamental di nos pueblo. Ya for di dia 14 di febrüari 2008 Staten di Antianan Ulandes na un manera kla a bisa ku ningun lei ku e tendensia diskriminatorio kontra nos pueblo no ta aseptabel. Tambe Staten a bisa unanimamente den nan último moshon di dia 1 sèptèmber ku tambe a keda aseptá unanimamente, ku ningun areglo ku por manda Antianonan bèk, bou di ningun sirkunstansia por ser mará na kambionan estatal manera ta e intenshon ku artíkulo 22 di e lei diskriminatorio aki. Asta Staten a manda e moshon ku nan posishon rònt mundu, esta pa Nashonnan Uní, komishon Europeo etc. Ulanda a hasi manera ni Staten, ni gobièrnu di Antias, ni Konseho Insular, ni gobièrnu di Kòrsou no ta bal nada. Ulanda a dal bai gewon.

E artíkulo 22 ku ta mara e lei na nos struktura estatal mes a keda grandi, grandi den e konsepto di lei. Ta kon gobièrnu di Antias i di Kòrsou por sinta na mesa ku Ulanda ku e konsepto di lei aki riba mesa, komo parti di kambio di struktura estatal?! Ta kon e gobièrnunan por bira kómplise, mientras Staten a manda pidi yudansa solidario di Nashonnan Uní, di Copppal, Parlatino i e komishon kontra Rasismo i Intoleransia?! Si Staten den su totalidat, tantu koalishon i oposishon ta konsiderá e lei aki komo un violashon di derecho humano fundamental di nos pueblo, si a aserká te asta e komishon kontra rasismo ta ku ki stoma anto ta bai sinta na mesa ku Ulanda sabiendo ku e lei aki te ahinda ta riba mesa. Pa tur hende ku dòs plaka di sintí gobièrnu di Antias i di Kòrsou, mester eksigí abase di prinsipio i di igualdat pa kita e konsepto di lei aki for di riba mesa, promé ku ke sigui papia di kambio di struktura estatal. Si gobièrnunan sinta ku e lei diskriminatorio aki riba mesa nan ta laga Staten i Konseho Insular den su totalidat kai manera patia bèrdè i ta kometé un akto di traishon i komplisidat kontra di pueblo di Kòrsou i di Antias.

Aliansa Patriótiko sosteniendo e posishon fuerte ku Staten i Konseho Insular di Kòrsou a tuma pa medio di nan moshon ta bolbe urgi gobièrnunan di Staten i di Kòrsou pa aktua ku dignidat dor di no sinta na mesa ku Ulanda tanten e lei aki ta riba mesa. Pa ekspresá nos repudio kontra e lei diskriminatorio aki i alabes sostené nos gobièrnunan, Aliansa Patriótiko tambe lo yuda pa logra ku nos tur pega stiker na nos outonan ku fisiblemente ta rechasá e lei di Apartheid Ulandes aki. Nos ta hasi un yamada na tur hende pa ekspresá públikamente atrabes di e stiker aki ku nos tur meskos ku Staten den su totalidat, meskos ku Konseho Insular den su totalidat ta repudiá e lei diskriminatorio aki. Den e kuadro aki djamars atardi 5or na krusada di lus di tráfiko na Sta. Maria, Aliansa Patriótiko lo tin akshon di plak stiker aki. Ku e akshon aki nos ta ekspresá nos repudio kontra e lei diskriminatorio i e manera rasista i intolerante ku gobièrnu Ulandes último añanan a bin ta atendé ku su partnernan den Reino. Aliansa Patriótiko ta hasi un yamada na tur organisashon polítiko i sosial i na pueblo di Kòrsou en general pa bini djamars awor na lus di tráfiko na Sta. Maria i sostené e akshon ku nos gobièrnunan a inisiá dor di laga plak i/ò yuda plak stiker riba outo di un i tur ku ta apoyá e akshon kontra e lei diskriminatorio aki.

Direktiva di Aliansa Patriótiko