Aliansa Patriótiko

“ Al is de leugen nog zo snel de waarheid

achterhaalt haar wel!”

Ketu bai e puitunan di e strategia Ulandes huntu ku e bende patrianan di Kòrsou i di Antia ta Sali na kla, probando ku ta desishonnan polítikonan tumá basta dia kaba na Ulanda, nan ta ehekutando. Ku masha fanfara tanchi Mè a bai prensa i bisa ku aki na Antia nan a tuma desishon pa posponé elekshon. Di aya banda nan a manda e otro mucha mandá ku no gusta papia bèrdat esta Zita Leito pa bisa ku mester di dos tersera parti di Staten i tambe ku mester warda konseho di Raad van Advies. Wèl, promé ku tanchi Mè, Zita Leito i Atacho a kaba ku nan komedia ya na Ulanda, na un manera disfrasá, gobièrnu Ulandes a pidi Raad van State konseho riba un situashon outónomo di Antia. E konseho ta kla i naturalmente na nan fabor, pero mester a skondé un ratu. Di mes tanchi Mè tabata na altura di esaki, anto el a sali ku sosten di Ulanda i di Raad van State pa bisa ku ta asina kos mester bai. Awor ku e konseho di Raad van State ta konosí, ta manda pidi Raad van Advies di Antia un ‘spoedadvies’. “Hoe zo mosterd na de maaltijd.”

Pa loke ta e dos tersera parti, ya kabes ta kontá, kaminda parlamentarionan di otro isla ku no ke tin nada di haber ku Kòrsou i ta preferá di ta den skochi di Ulanda ta forma e mayoria di dos tersera parti pa violá nos konstitushon. Na tur pais di mundu, ora ta bai kambia e periodo di gobernashon ankrá den konstitushon, mester kambia konstitushon, mester konsultá pueblo pa medio di un referèndem. Pa kolmo e kambio tin ku drenta na vigor pa e próksimo periodo di gobernashon i no pa alargá e periodo di gobernashon koriente. Kasualmente djabièrnè senado di Colombia a aprobá pa tene un referèndem riba e posibilidat pa Uribe por pone su mes re elegibel un bia mas.

Manera un ladron den anochi Raad van State Ulandes ta duna un konseho pa no tene elekshon na Antia. Nos ke sa kon e Raad van State lo a formulá su konseho si tabata trata demokrasia di Ulanda. E ora ei si sigur nan lo a papia di prinsipio, tradishon demokrátiko, di Willem van Orange, di Alva i tur e prosedernan Ulandes pa yega na e konklushon ku ta imposibel pa hasi algu asina, pasó Ulanda no ta un repúblika di banana. Pero pa Kòrsou i Antia si por apliká e sistema di repúblika di banana. E desishon aki ta sumamente peligroso, pasó e ta krea un presedente polítiko estatal mortal pa nos demokrasia. Dikon? Mañan ku Dios ke un òf dos partido ku ta na mando ku un òf mas loko den nan seno, ta disidí ku nan ke keda sinta i nan ta hinka un argumento den otro pa hustifiká prolongashon di nan gobernashon i ku nan no tin gana di sinta warda elekshon manera Tanchi Mè ta bisando aworakí. Minister di struktura estatal Roland Duncan djasabra públikamente a deklará ku e koalishon aktual mester keda sinta te ora tin garantia ku no por kambia nada mas. Despues si e por bai kas trankil pasó “de kogel is door de kerk.” Si bo analisá lokual ta sosodiendo aktualmente, ta e desishon i e malchi ku Hirsch Balin a pasa den stròp di e delegashon na Ulanda den forma di e ‘slotverkaring’ nan ta ehekutando sin kambia niun punto, ni niun kòma. Ta manera nan mes na vários okashon a yega di bisa: “Het is gegoten in beton.” Kier men ku tur votadónan di Si awor ta realisá ku a kue nan kabes abou. I pa e stranheronan ku a vota Si regalando nos pais na e Ulandesnan ku e promesa ku nan lo haña pasaporte, nos tin masha mal notisia pa nan. A subi mesa un lei ku ta bai limitá nos mes ku ta nasé riba teritorio Ulandes. Pues na e stranheronan nos tin ku bisa: “Que lamentable.”

Ku esaki asta pa esnan ku no kier a kere e pruebanan bibu di e ingredientenan di rekolonisashon ta sigui subi mesa. Nos sa ku tin hopi yu di Kòrsou ku a vota di bou di promesanan falsu i ku awor ta sinti nan mal uzá. Pero no ta lat, pasó miéntras nochi no sera kareda di biná no a kaba. I nos derechi di outodeterminashon tei manera un baranka, e ta inalienabel, e ta ‘onvervreemdbaar’, pues nochi ta leu fo’i sera pa pueblo di Kòrsou.

“Pueblo di Kòrsou lanta pa konhuntamente nos sali na defensa di nos derechi di outodeterminashon. Ban sigui ehèmpel di Tula, ban sigui ehèmpel di Doktor i Jonckheer, ban para duru manera e pueblo di Hondúras a i ta parando pa su prinsipio demokrátiko.”

Direktiva di Aliansa Patriótiko