Aliansa Patriótiko

E lucha pa defendé nos demokrasia lo intensifiká

Pa medio di esaki Aliansa Patriótiko ta anunsiá ku ela start su akshon pa mobilisá nos miembronan. Meta di e akshon i mobilisashon aki ta pa intensifiká nos lucha pa nos derechi di outodeterminashon pa asina defendé nos demokrasia ku tur nos forsa.

Un di e promé ehersisionan ta, bai den e 5 regionnan i instalá den kada un di e regionnan un Komité Patriótiko. Kiko ta un Komité Patriótiko, kon ta instalá un Komité Patriótiko i kiko ta tarea di un Komité Patriótiko lo ser ampliá durante e enkuentronan den kada region. Loke nos por adelantá ta ku esaki lo ta un di e armanan di mas fuerte den nos organisashon pa ku nos lucha.

E promé Komité Patriótiko ya a ser instalá djarason último i ta region Sentro tabata tin e honor aki. E siguiente region na turno lo ta region Nort i e enkuentro den e region aki lo tuma lugá djaweps awor 27 di ougùstùs 2009. Enkuentro den region Pabou lo ta djasabra 29 di ougùstùs, den region Bandabou lo ta djadumingu 30 di ougùstùs i den region Pariba lo ta djasabra 5 di sèptèmber. Miembronan di kada region lo haña invitashon via sms òf via un yamada telefóniko pa sa e orario i e lugá di e enkuentro. Pues keda pendiente pa esaki. Den e luna di sèptèmber 2009 nos lo tene nos promé reunion general pa e temporada nobo i krusial aki. Dia, ora i lugá nos lo anunsiá despues.

Aliansa Patriótiko ta konta ku bo presensia dia tin enkuentro den bo region i mas ku klaro na nos reunion general tambe.

Direktiva di Aliansa Patriótiko