Kòrsou Quo Vadis

Parti 3

Nombramentu polítiko i politikeria personal i partidista tabata na orden di dia den e delaster siman. Den esaki partido PAR a demostrá un bia mas di ta balotá inteligensia di e pueblo aki keriendo ku tur kos ku nan splika na un manera lembe lansa ta drenta manera ‘zoete koek’. Echo ta ku PAR ta drai rònt di algun persona di konfiansa di tanchi Mè ku mester hèndel tur problema polítiko ò preshon interno. Partido PAR a bandoná por kompletu e lokual nan mes tabata propagandá antes ku mester nombra hende abase di nan kapasidat, nan kalifikashon i nan abilidat pa asina bo por kumpli ku nan prinsipio di hopi tempu pasá ku ta pone “ the right man in the right place”.

Awor no ta importá kapasidat, no ta importá konosemntu ni no ta importá abilidat. Lo ke ta importá ta konfiansa di tanchi Mè i bo mester ta dispuesto di aseptá desishon di tanchi Mè. Pa e mesun lema aki a kore ku Franco, Zita, Ys, Sulvaran i tur ku ke a trese kambio. Awor tabata bùrt di Rugghenaath. Tanchi Mè mes a bisa ku tur esnan ku a Sali a drai un tiki rònt i bin bèk PAR. Refireiendo klaramente na e aktual presidente di PAR, kende ta Glen Sulvaran. Esei tambe a hunga prinsipieel, buska otro kaminda, haña trabou serka gobièrnu komo consultant, lubidá prinsipio i bai PAR bèk. Awor a degradá David Dick dunand’é un tarea pa bai kòrta riba teritorio insular di Kòrsou i pone Magali Jacoba na kabes di e ministerio mas kompliká den gobernashon. Analisando bon PAR a pensa ku eigenlijk no mester di hende mes na hustisia, pasó ta Ulanda ta disidi riba tereno di Hustisia. Ku otro palabra mester di un hende ku solamente por bisa ‘ja jufrouw, ja meneer, is goed meneer, is goed jufrouw’ i nan a haña Magali Jacoba. I ta lógiko, pasó minister president Bijleveld a duna òrdu pa pone un pòpchi i/ò un títere. Pakolmo e ta haña salaris di un minister. “Kiko mas Magali ke.” Esaki ta e rekompensa pa su lealtat na tanchi Mè, Bijveld i Balkenende. Ta esaki ta e bienestar ku 52% a vota SI pe. Wèl ta bienestar si, pero pa tur e siguidónan klave den PAR manera entre otro Magali Jacoba i David Dick i no pa pueblo. Pa loke ta David Dick mes, Ulanda ta kla kuné. Ulanda a uzé pa e entregá nos Hustisia i awor mester kore kuné. Pero debí ku e sa muchu kos a disidí di kore kuné te despues di elekshon. Mientras tantu a dumpé komo diputado den un gobièrnu ku ta kompletamente dominá i kontralá dor di Ulanda atraves di e bomba finansiero, CFT. Pakolmo a entregá ekonomia i turismo den su man. “Kòrsou, Quo Vadis.”

Nos ta mira e strategia aki ku Ulanda i/ò Ulandes su tras den otro kasonan manera DOK, CEMS i asta na Hospital St. Elisabeth. Lantando un kapa di humo ku gordura di hende propagando unidat den salubridat di e otro un banda ta kòrta na CEMS i na Hospital hinkando Ulandesnan den posishonnan klave i amigunan polítiko komo consultant pa kaba di koroná e obra. Poko, poko pero sigur alfinal den tur e kompanianan aki mester tin maske ta un makamba den tòp. Ta esaki ta e táktika tradishonal di rekolonisashon.

Mientras ku tur hende ta pone atenshon na e manipulashonan polítiko aki, situashon sosio-ekonómiko ta leu for di kanta makamba.

Bida pa trahadó i e klase marginá ta impagabel, mientras ku te ahinda e promesa di yena frishidèr no a ser kumplí, e promesa di bienestar no a ser kumplí i e situashon di pobresa ta sigui empeorá. Esaki ta keda probá ku sifranan di nos propio buró di estadistika (CBS). E sifranan aki ta indiká ku 33% di famianan na Kòrsou ta biba bou di e limté di pobresa, mientras ku 20% di nos poblashon ta gana solamente 3% di nos entreda total. Banda di esaki segun e mesun sifranan 25.000 hende ta biba den un situashon deplorabel. Pa loke ta hobennan, nos tin mas o menos 60.000 hoben di kua 12.000 ta den problema serio i 9.500 mucha ta biba den un situashon asina malu ku por verwagt ku nan tambe lo kai den problema.

Mientras ku pueblo ta den e situashon penoso aki, kaminda situashon dia pa dia ta bai mas atras partido PAR ta preokupá i drùk bezig ta akomodá su Dicknan i su Magalinan.

Ta esaki ta e bienestar ku 52% a votá i boga pe?