Kòrsou, ‘Quo Vadis’?!

Part 2

Novela den PAR

Siman pasá tabata tin akontesimentunan aki na Kòrsou ku ta proba lokual nos a bisa esta ku nos a drenta un káos di gobernashon ku tur su konsekuenshanan. Na promé lugá e komedia polítiko ku a tuma lugá rònt di e retiro di diputado Rhuggenaath. Partido PAR a yama un reunion urgente kaminda e lider polítiko Emely de Jongh Elhage (tanchi Mè) ku un kara tur batí a purba konvensé pueblo di Kòrsou ku retiro di Rhuggenaath ta un kos bon i ku no tin problema den PAR. Un par di dia promé tabata tin tur sorto di deklarashon. Te asta señor Rhuggenaath a deklará ku no tin niun sorto di retiro pa despues a yama un reunion di PAR kaminda tur hende a bai laria. Otro mainta diputado Rhuggenaath a pidi retiro pa motibu ku awor el a ripará ku e mester pasa mas tempu ku kasa i yu. Banda di dje tanchi Mè a lòs, na si ‘style’ un kantidat di kos bunita. Ta yora so e no a yora. Awor pregunta ta: “Ta kiko a ofresé Rhuggenaath presis?” Tempu ta e mihó maestro. Echo ta ku e komedia di PAR aki a dal un sla na kredibilidat di PAR i di Rhuggenaath. Porta ta esei tabata e intenshon tambe pa ku Rhuggenaath. Ta kiko ta e preis, nos lo haña sa den e próksimo lunanan.

Sitaushon na DEZ

Den tur e sansañanan polítiko di PAR a surgi ku ta baha gasolin na lugá di subié pa motibu di kalkulashonnan robes di parti di DEZ ku ta e departamentu di asuntunan ekonómiko. DEZ a sali splika ku nan no tin sufisiente hende. Esaki no ta kos di awor. Dios sa kuantu kalkulashon robes a hasi pa loke ta gasolin, indexering, preis di produktonan, tarifanan di bùs etc. Un káos kompletu! Ta ki konfiansa e pueblo aki por tin anto den sifranan ku gobièrnu, lesa DEZ, publiká riba por ehèmpel nos ekonomia. Te ainda gobièrnu mes no a publiká su reakshon riba e hustifikashon mediokre di DEZ.

Sitaushon di DOK

Den e mesun siman tras di lomba a surgi desishonnan pa manda un kantidat grandi di trahadónan kas. Awor e kos di DOK no ta kos di awe ni di ayera. Un bes mas ta falta di maneho di gobièrnu a pone ku a yega asina leu. E gobièrnu aktual tabata mas preokupá ku e pregunta kua amigu mester bira direktor, kua ta e amigunan ku mester drenta den e konseho di komisario i kiko ta kumbiní polítikamente, ku formulá un maneho pa garantisá eksistensha di DOK i e kuponan di trabou ku esaki ta representá. Awor nos tin un empresa ku tin un mantenshon atrasá enorme ku ke bende probablemente na preis di baka flaku. Pues un káos kompletu.

Komo sifuera no ta sufisiente pa un siman a lanta un pleitu ku shofùrnan di diputado. Despues ku a kibra e maneho di un ‘pool’ di shofùr pa por hinka amigunan polítiko di diputado, e kos di mes a pega. Shofùr a hiba gobièrnu dilanti, gana e kaso i ta ken ta paga? No gobièrnu, no e diputado sino e pueblo. Den purá ke drecha e erornan ku areglo nobo ku naturalmente e shofùrnan ta kontra. Diputado Zita Leito ku nunka bo no sa kiko ta bèrdat ora e papia, ta deklará ku a manda un ámtenar splika e shofùrnan lokual Zita i su diputadonan a disidí. Pakiko no a manda Zita mes?! Probablemente pa motibu ku Zita Leito den e mesun siman aki a pleita formalmente ku un kolaboradó di si propio partido na un manera ku no ta ehèmpel di elegansia. Ta sla so no a kai. Ta un káos kompletu gobernashon a para bira.

Nos enseñansa

E siman aki skol ta bai kuminsá. Promé ku skol kuminsá tin e kompetensha publisitario entre direktivanan di skol ku nan asina yamá ‘Conferentiedag’. Pa garantisá éksito publisitario ta obligá maestronan pa partisipá sino ta kita salario for di nan. Pakiko mester menasá i obligá maestronan?! Nos ta sigur ku si organisá un kos bon ku kontenido na drechi, ta ridíkulo pa obligá maestronan di skol. Pero ya, ta e potrètnan den korant ku ‘partisipashon masal’ ta importante ya asina e kompetensha por bai ròndu. Un òf dos dia despues skolnan ta habri pa e muchanan kaminda falta un kantidat di maestro, un kantidat di material i ademas un kantidat di mucha sin skol i ku no por paga ni nan unifòrm. Anto ken ta esun ku tin ku resolvé boka ketu i saka motivashon pa traha kaminda no tin....... Enbèrdat, e mesun maestro ku ta obligá i menasá pa presta na un manera optimal. Pues pa loke ta nos enseñansa tambe ta un káos kompletu.

Otro siman nos ta bin ku análisis kompletu entorno nos enseñansa, ku sifranan real. Keda pendiente pa esaki.

W.t.t.k.

By the way na Ulanda nan a prolongá detenshon di Don Sabe lo Todo, Joost Pronk, akusá di kontrabanda i negoshi ilegal.

Direktiva di Aliansa patriótiko