Aliansa Patriótiko

Resultado Kumbre Internashonal “Di Outonomia Real pa Soberania”

Den fiman di siman tras di lomba Aliansa Patriótiko ku apoye i sosten di Fundashon Kòrsou Fuerte i Outónomi Fundashon Desaroyo Popular a organisa un Kumbre Internashonal titulá “Di Outonomia Real pa Soberania”.

Den un sala kompletamente yen a tene e seremonia di apertura djabièrnè anochi kaminda e oradornan ku tabata Gustavo Carvajal di Mexico, presidente athunto di COPPPAL, Fernado Martin eksperto riba tereno di outodeterminashon di Puerto Rico i Errol Cova presidente athunto di Aliansa Patriótiko. Ya for di e apertura a sinti un vibrashon di determinashon serka e partispantenan ora ku e oradornan a adelantá e kontenido di e kumbre. Djasabra tabata e promé dia kaminda a hiba palabra e dos oradornan internashonal esta señores Carvajal i Martin, señor Hendrik Croes i señor Caryl Monte di Kòrsou. Na un manera profundo i ekstenso a hasi analisis di COPPPAL, e derechi di outodeterminashon i e situashon di Aruba i Kòrsou den henter e proseso di struktura estatal aktual. Hopi fuerte a bin dilanti basá riba e dokumentonan di Nashonnan Uní i eksperensha konkreto di Puerto Rico ku e derechi di outodeterminashon ta un derechi inalienabel di pueblo di Kòrsou. A keda probá ku tur desishon tumá ku no ta kuadra ku e ley di outodeterminashon internashonal ta simplemente nulo. Ku ehèmpelnan konkreto e eksperto internashonal a ilustrá esaki. Ku e posishon aki e lokual Aliansa Patriótiko a bin ta bisa ku ningun di e desishonnan ku a ser tumá no por stroba e lucha pa reskatá nos outonomia real pa yega na un soberania pa e pueblo di Kòrsou. Den un reunion plenario di djasabra atardi a profundisá tur e aspektonan huntu ku un pènel ku a konsistí di e kuater oradónan. Djadumingu mainta atrobe partisipantenan a yena e sala Wayaka den WTC pa diskutí e konsepto di e resolushon final. Den un prosedura totalmente demokrátiko i transparente a diskutí, adaptá e resolushon te ora a base di e aportenan e sala a aprobá esaki unanimanente. E resuloshon aki ku nos ta manda athunto ta papia pa su mes.

Pues no tin ningun desishon ku a ser tumá òf lo ser tumá ku ta empugna di e resolushonnan di Nashonnan Uní ku por stroba pueblo di Kòrsou kana e kaminda “Di Outonomia Reak pa Soberania”. Tambe a palabrá ku COPPPAL e pasonan konkreto pa internashonalisá e lucha ku akshonnan visibel na paisnan di Amerika Latina i di Asia. E internashonalisashon di e lucha ta e garantia ku nos pueblo ta bai logra, pasó e ta basá netamente riba derechi internashonal di pueblo di Kòrsou. E puntonan di prinsipio legal ta entre otro e reserva implísito ku Nashonan Uní a pone ora a saka Antianan for di e lista di kolonianan i e konvenio di 1960 ku ta duna nos e derechi inalienabel.

Banda di e resolushon final aki e kumbre unanimamente a aseptá n deklarashon tokante e próksimo elekshon ku ta tuma lugá djabièrnè awor. Basikamente nos kumbre ta ekspresá ku ta inaspetabel ku ta pone nos derechi di outodeterminashon na benta polítiko. Ademas según derechi di outodeterminashon e akuerdonan aki ta nulo. Den e kuadro aki e kumbre ta manda un mensahe pa pueblo di Kòrsou pa tene kuenta ora di vota djabièrnè ta ken nan ta duna nan konfiansa ya ku awor ta resultá un biaha mas ku esnan ku a vota NO tabata tin tur rason di mundu. Mester rechasá tur esnan ku a demostrá ku ta dispuesto di bende nos derechinan i sostené tur esnan ku realmente ke logra emansipashon di nos pueblo i kana e kaminda ku Nashonan Uní mes a stipulá den kuadro di derechi di outodeterminashon di un pueblo. Kaminda tin, ta kana mester kan’é konhuntamente. Pues NO ta keda NO!

Athunto: e resolushon kumbre internashonal “Di Outonomia Real pa Soberania”.

Direktiva di Alainsa Patriótiko