Aliansa Patriótiko

                                               Mas kolonial ku esaki no por!

Ku rechaso kompletu Aliansa Patriótiko a tuma nota di e desishon imponé riba Gezaghebber di Boneiru pa manda un desishon demokrátiko di Konseho Insular di Boneiru pa Gobernadó di Antias destruí. Aki Ulanda (Gezaghebber di Boneiru) ta manda un desishon demokrátiko (pueblo di Boneiru) pa Ulanda mes (Gobernadó) destruí. Mas kolonial ku esaki no por!

Ora bo lesa e karta ku Gezaghebber riba òrdu di Ulanda a manda pa Ulanda mes (Gobernadó) bo ta mira ku ta argumento rashonal no tin. Ku e mesun argumentunan uzá dor di Gezaghebber di Boneiru por a destruí tur desishon ku Konseho Insular di Kòrsou ku su 11/10 a tuma den e trayekto di struktura estatal, inkluso desishonnan riba e último referèndum. No ta e mesun Nashonnan Uní a konta pa Kòrsou? Of ta ora e mayoria ta pro Ulanda ta interpretá Nashonan Uní na un manera i ora no ta kumbiní Ulanda, na otro manera?! Aki si diripiente bos di pueblo no ta konta mas? Aki si mayoria diripiente no ta konta mas? Ademas e argumentonan uzá dor di Gezaghebber di Boneiru no ta kuadra ku e kuadro hurídiko di Nashonnan Uní tampoko.

Echo ta ku for di momentu ku gobièrnu i Konseho Insular di Boneiru tabata tin e kurashi di tuma un posishon konforme Nashonan Uní i na fabor di pueblo di Boneiru, riba ken si i ken no por vota, Colon a kima. Simplemente Boneiru no ke pa kometé e mesun inhustisia ku a kometé kontra e pueblo di Kòrsou. Esmas e situashon na Boneiru ta muchu mas pió ku na Kòrsou, pasombra na Boneiru e kantidat di makamba proporshonalmente ta muchu mas grandi ku aki na Kòrsou. Awor ku a krea e espasio pa e pueblo Boneraino mes determiná futuro i rumbo di nan pais, Ulanda a spanta. Ulanda a mobilisá e dos figuranan estatal mas kolonial ku nos tin, esta Gezaghebber i Gobernadó. Echo ta ku gobièrnu di Boneiru i Konseho Insular di Boneiru a spanta Ulanda. A pone nan para ketu i strategikamente nan a rekurí na nan último arma kolonial, esta e dos figuranan mas haltu ku nan mes ta nombra. Un prueba mas ku realmente nos ta bèk na promé ku añanan ’54, esta e ERA KOLONIAL.

Aliansa Patriótiko ta rechasá e aktitut i aktuashon kolonial aki kategorikamente i ta atvertí Ulanda i su bombanan ku e tipo di aktonan a-demokratiko aki ta lanta un pueblo kolonisá. Nos ta atvertí pasombra historia kolonial a proba tur tempu i tur kaminda ku al final ta e aktonan di e pais kolonisadó mes ta lanta e pueblo kolonisá i nos lo no ta un eksepeshon.

Awe Aliansa Patriótiko mesora despues di a tuma nota di e desishon kolonial aki a pone COPPPAL na altura i a pidi e organisashon aki pa pronunsiá su mes internashonalmente kontra di e akto di rekolonisashon Ulandes aki. Nos ta ripití ku Aliansa Patriótiko lo no sosega promé ku e derechi legítimo di outodeterminashon di nos pueblonan ser respetá kompletamente tantu dor di Ulanda komo su muchanan mandá.

Direktiva di Aliansa Patriótiko