KOMUNIKADO DI PRENSA

For di 1634, e aña ku e Ulandesnan Oropeo a invadí Kòrsou, a eksistí un relashon kolonial entre Ulanda i Kòrsou den kua Ulanda a determiná e desaroyo estatal di Kòrsou. For di e tempu aki te ku 1954 ta na Ulanda Ulandesnan, promé pa medio di nan parlamentu, pero for di 1815 pa medio di nan rei, a determiná i disidí eksaktamente i eksklusivamente kon ta goberná Kòrsou i e otro kolonianan di Ulanda. Manera a ekspresá esaki: “De Koning heeft het opperbestuur van de koloniën”.

Den esaki, bou di preshon internashonal despues di segunda guera mundial pa paisnan kolonisadó dekolonisá, a bini un tiki kambio den Reino Ulandes  ku introdukshon di, promé, e Areglo Interim na 1950 i, despues, Statüt na aña 1954. Esakinan i, prinsipalmente, Statüt a introdusí te na un sierto nivel un grado di outonomia pa e kolonianan Ulandes. Statüt a determiná e terenonan ku en adelanto e kolonianan mes lo por regla. Tambe e kolonianan a haña outoridat pa ehekutá e tareanan riba e terenonan aki. No opstante  esaki semper Ulanda a mantené su poder pa por intervení den e asuntunan aki si, na su opinion, bon gobernashon di e tareanan aki bin na peliger den su kolonianan ku asina a bira semi outónomo.

Den e kampaña pa referèndem 2009, kontinuamente nos minister presidente, Emily De Jongh-Elhage, a propagá ku si bo vota si bo ta vota pa un Kòrsou outónomo. Tambe Emily De Jongh-Elhage a ninga insistentemente ku lo a bin kambio den Statüt riba puntonan kardinal i ku ta p’esei, segun e, nos mester i por a vota si trankilamente pa por logra un Kòrsou outónomo. Fuera ku por diskutí si en bèrdat por bisa ku pueblo di Kòrsou a vota si, pasobra e márgen di bentaha di opshon si riba opshon nò den e referèndem di 2009 a resultá di ta hopi marginal, awor a bini na kla ku loke e propagadónan di opshon si a pinta pa pueblo di Kòrsou a resultá di ta un engaño hopi serio i di marka mayó ku ta kaba ku tur klase di outonomia real.

Den siman ku a pasa parlamentu di Ulanda, den deliberashon riba e kambio di Statüt, ku lo no tabata nada mas, segun nos promé minister Emily De Jongh-Elhage durante di kampaña pa referèndem 2009, kambionan menor pa ekspresá ku Kòrsou ta bira un pais outónomo, a disidí ku ta solamente Ulanda su gobièrnu, eksklusivamente i unilateral, pa medio di un dekreto di su gobièrnu, lo disidí kiko lo konta pa Kòrsou i/òf Sint Maarten den tur diskushon i/òf konflikto di opinion ku surgi entre Kòrsou i/òf Sint Maarten i/òf Ulanda na kaminda pa Kòrsou bira un pais outónomo. Esaki ta nifiká ku Kòrsou lo bolbe den e situashon estatal ku tabata eksistí promé ku introdukshon di Statüt na 1954. Esta Kòrsou atrobe ta bira un kolonia kompletu di Ulanda kaminda ta Ulanda lo disidí kiko ta sosodé na Kòrsou òf manera por ekspresá esaki: “De Koning verkrijgt wederom het opperbestuur van de koloniën”.

Fundashon Kòrsou Fuerte i Outónomo (KFO) a bin ta atvertí kontra di loke gobièrnu aktual di promé minister Emily De Jongh-Elhage a bin ta aseptá di Ulanda. Awor ta resultá ku nos tabatin rason i ku gobièrnu di Emily De Jongh-Elhage a aseptá pa Kòrsou bai bèk den un  situashon kompletamente kolonial, manera esaki tabata eksistí promé ku Statüt di 1954 i den kua ta konta: “De Koning heeft het opperbestuur van de koloniën”, kaminda, pues ta gobièrnu di Ulanda ta disidí i determiná kiko nos supuesto “outonomia” ta enserá. KFO ta oponé e intenshon di Ulanda i gobièrnu aktual di promé minister Emily De Jongh-Elhage pa sigui mina e outonomia di Kòrsou, ku nos a skohe den  referèndem 2005.

Segun e miembro di e gobièrnu di Emily De Jongh-Elhage, esta Omayra Leeflang, ta e gobièrnu aki mes a bin tambe ku e supuesto plan B di sekretario di estado pa asuntunan di reino Ulandes Ank Bijleveld. E Plan B aki ta enserá ku for di awor ta introdusí un medida general di reino ku ta regla ku entrante e fecha 10-10-10, Ulanda ta haña tur poder pa por hasi i deshasí den su diskreshon eksklusivo riba tur asuntu outónomo di Kòrsou ki ora e haña ku Kòrsou (i/òf Sint Maarten) no ta kla i/òf kapas pa atendé ku su asuntunan outónomo entrante e fecha di 10-10-10. Ya sekretario di estado pa asuntunan di reino Ulandes, Ank Bijleveld, den su “voortgangsrapportage” di 30 di sèptèmber 2009, a rekonosé i a disidí pa Kòrsou ku di ningun manera Kòrsou (òf Sint Maarten) lo por yega e estado di pais outónomo pa 10-10-10. Ku otro palabra, ya ta establesé ku gobièrnu di Emily De Jongh-Elhage a entregá e poko di nos outonomia, ku Statüt a trese kuné, bek na Ulanda, pasobra, entrante 10-10-10, ta Ulanda, meskos ku anteriormente den tempu di kolonialismo total promé ku 1954, lo (sigui) disidí riba e pida baranka aki.

Hasta e parlamentu Ulandes mes a bisa ku e gobièrnu di Emily De Jongh-Elhage ta bai realisá “lege landen”. Asin’aki e parlamentu Ulandes a yama e plan B ku Omayra Leeflang, ku un orguyo inkomprensibel i kompletamente for di sla, a deklará ku ta su gobièrnu mes a pens’é. Parlamentarionan Ulandes mes, esta Johan Remkes i Ronald van Raak, públikamente, a hasi e pregunta ta kon Kòrsou (i Sint Maarten) por a aseptá e rumbo aki ku no ta laga nada hinté di e outonomia pa kua e pueblo di Kòrsou a skohe den referèndem 2005. E aktitut di gobièrnu di Emily De Jongh-Elhage ta buta nos rekordá e anochi krusial ayá di Huebes Santu mas òf ménos 2000 aña pasá.

Den pasado defuntu Carlos Dip, lástimamente aworakí solamente di memoria patriótiko i felis, tambe a atvertí e gobièrnu di Emily De Jongh-Elhage p’e no sigui riba e kaminda ku e a drenta pa Kòrsou despues di referèndem 2005, den kua pueblo di Kòrsou a skohe pa un pais outónomo asosiá ku Ulanda òf, manera esaki a ser denominá, pa un status aparte manera esun di Aruba. Defuntu Carlos Dip a atvertí ku e rumbo di gobièrnu di Emily De Jongh-Elhage lo resultá den un outonomia ku ta manera un bala di skopèt sin pòlvo. Awor nos ta mira ku e gobièrnu di Emily De Jongh-Elhage no a tuma e atvertensha aki na kurason. E gobièrnunan aktual a trese un káos total den reino ku ta hasi ku Kòrsou no por logra su outonomia, manera pueblo a skohe den referèndem 2005. Tin problemanan hopi grandi entre Ulanda, di un  banda, i Boneiru i/òf Sint Maarten, di otro banda. Pueblo di Kòrsou a skohe eksaktamente pa ta lòs di e otro islanan i e tipo di problemanan aki. Pa KFO ta inkomprendibel kon gobièrnu di Emily De Jongh-Elhage ta laga problema entre Ulanda i su otro kolonianan impedí emansipashon di Kòrsou i su pueblo. Nos ta sigui vigilá e emansipashon aki minisiosamente i ta sigui atvertí.

Kòrsou, 16 di novèmber 2009.