Karta habrí pa Ernst Hirsch Ballin

 

1 di sèptèmber 2009 Parlamento antiano i Konseho Insular, e órganonan mas haltu di Kòrsou i di Antia, a mustra na un manera kla i transparente ku nan ta kontra e Lei di Reino di Trafikashon di Persona, ku abo i gobièrnu hulandes a proponé. Nos komunidat a hiba un diskushon di prinsipio riba e tema aki.

E ta un ehèmpel di e tendensia general den bo pais, pa uza e tipo di areglonan aki komo solushon pa problemanan ku hóbennan antiano, sin tene kuenta ku e derechonan humano fundamental di tur esnan envolví. Komo habitante di Antia, èks-kolonia di Hulanda i kargadó di pasport hulandes, nos tin akseso liber na Hulanda, e pais kolonisadó di antaño.

Pa atendé e problemanan di un grupo spesífiko di hóben ku problema na Hulanda, pa medio di un lei ku tin reperkushon hurídiko den henter reino, ta un kañon pa mata un muskita, i e no ta un solushon adekuá pa e problema spesífiko aki i por lo tantu e no ta un solushon legítimo.

Esaki ta un desapunto pa tur esnan ku ainda ta konsiderá Hulanda nan mama patria i sigur preokupante pa tur habitante di Antia Hulandes i di Aruba, pasobra bo ta manda un señal robes. E ta un intento mas pa tene Antiano i Arubano ku nashonalidat hulandes for di e teritorio di reino na Europa, basá riba nan desendensia.

Laga nos no tuma otro hasi: e lei aki ta respirá e mesun pensamentu ku VIA, e sistema di registrashon di Antiano i Arubano i e areglo pa manda Antiano/Arubano bèk, e tin un meta represivo. Bo ta bai asina leu ku den e kuadro aki bo ke sera un hulandes karibense ku lei den bo man, miéntras ku esaki nunka ántes tabata posibel. Hasta si Raad van State duna bo e outorisashon, manera a sosodé anteriormente den e kaso den korte na Hulanda ku VIA, nos pueblo nunka lo no entregá.

Bo a hunga un wega sabí ku nos: bo  a pone e lei di trafikashon di persona den e lei di reino pa suidadania hulandes i hasié asina un asuntu di reino den sentido di artíkulo 3 di Statüt pa asina ekskluí ku nos gobièrnunan por influenshá bo desishon. Bo a laga e fayonan di bo antesesornan rasista guia bo pensamentu, pasobra nan ker a hasi meskos ku bo, pero no a logra, pasobra nan areglo a topa ku tantu resistensia. Nos a komprondé e wega hurídiko ku bo ke hunga ku nos derechonan fundamental bon bon. Bo sa ku Hulanda nunka lo no a haña aprobashon di nos gobièrnunan den un lei di konsenso riba e tópiko aki.

Komo nos no tin ningun konfiansa den nos gobièrnu antiano aktual i nos a ripará ku nos Minister Presidènt lo no aktua ku un señal fuerte ku no ta laga duda, maske nos parlamento a dun'é òrdu pa hasi esaki, nos a haña ta bon pa pone bo na altura ku bo inisiativa nobo, tambe ta inakseptabel pa nos pueblo. E moshonnan di nos Parlamentu di Kòrsou i di Antia, no ta laga espasio pa duda.

Teniendo kuenta ku nos posishon hurídiko i estatal, nos no por tolerá ku lo hasi diferensia den trato entre diferente tipo di hulandes basando esaki riba nan desendensia, pasobra esaki no ta un kriterio ophetivo. E hecho ku abo i otro polítiko hulandes rasista ta uza komo argumento ku e lei lo konta pa tur hulandes den reino, pa asina evitá ku migrashon ku e meta pa probechá di otro su sistema sosial ta tuma lugá, ta nònsèns. Ningun hulandes ku ta biba na Hulanda lo ta dispuesto pa kambia nan seguridat sosial na Hulanda pa e ònderstant miserabel ku nan por haña na Aruba i Antia.

Ku artíkulo 22 di e lei rasista aki ta bisa ku e ta bira efektivo asina ku instituí pais Kòrsou, St. Maarten i e entidatnan públiko BES, ta algu apsurdo, i un intento deliberá pa fortifiká un pensamentu ku ya tabata t'ei, pero ku awor ta haña forsa di lei. Nos mester aseptá e lei aki huntu ku Pais Kòrsou sino no ta bin pais ni sèn. Anto esaki no ta  terorismo estatal? Komo bon hurista lo bo sa sin kabe duda, ku Korte Oropeo di Derechonan Humano a bisa eksplísitamente, ku desendensia no por keda konsiderá un kriterio ophetivo pa diferensiá entre habitantenan ku un nashonalidat. Esaki ta e motibu ku tur e otro areglonan den e esfera aki no a kristalisá. Bo gobièrnu ta persistí den maldat i den stigmatisashon di nos pueblonan. Kòrda ku esaki tambe ta un kriterio ku tin ku tene kuenta kuné ora ta tochi derechinan fundamental di hende. No duda den nos determinashon, nos pueblonan lo resistí tur bo intentonan ku tur medionan na nos disposishon.

Nos ke evitá di tur forma ku e lei aki ta habri kaminda pa polítiko hulandes haña e posibilidat pa apliká mas di e tipo di medidanan aki kontra nos hendenan. Polítikonan hulandes ku no sa òf no ke sa ku nos tabata parti di reino  hulandes promé ku e provinsia di Limburg, inklusive Venlo, e residensia di un otro rasista i polítiko ku ta kontra nos, yamá Geert Wilders.

Pa finalisá nos ta sita Korte Europeo pa Derechonan Humano: "Racial discrimination is a particularly invidious kind of discrimination and, in view of its perilous consequences, requires from the authorities special vigilance and a vigorous reaction". Nos ta sigurá bo ku bo por spera e mesun reakshon i resistensia di nos pueblo kontra bo areglo.