Aliansa Patriótiko

Manipulashon opnion públiko

Un biaha mas a keda komprobá ku ta manipulá pueblo di Kòrsou riba un punto asina importante manera proseso di nos struktura estatal. Hulanda atrabes di minister Hirsch Ballin a formulá un proposishon di ley Reino di trafikashon di hende ku tin un toke rasista i diskriminatorio. E konsepto di ley aki a ser rechasá kategorikamente dor di Staten di Antianan Hulandes i Konseho Insular di Kòrsou. Unánimamente, pues tantu koalishon i oposishon di Staten i Konseho Insular a vota kontra di e konsepto di ley i kualkier intento di Hulanda pa bin ku un areglo pa saka nos hende for di Hulanda. Staten asta e moshon di rechaso aki pa Nashonnan Uní i e komishon kontra di Rasismo i Intoleransia di Europa. Staten a ordená Minister Presidènt pa manda un karta hopi kla pa Hulanda. Minister Presidènt te ku dia di awe no a kumpli ku esaki. Loke si Minister Presidènt a sa di hasi a subi su kabai di manipulashon bisando ku ela lo papia ku Hulanda pasó su partido tambe ta kontra di kualkier areglo pa manda yu di Kòrsou bèk. Despues Minister Presidènt a bai prensa ku un aire di triunfo bisando ku tantu señora Bijleveld komo Hirsch Ballin a bisé ku e konsepto di e ley rasista di Trafikashon di hende aki ta for di mesa. Ora un Minister Presidènt hasi un deklarashon asina ta lógiko ku tur hende mester kere esaki, pasó un Minister Presidènt konsientemente no por duna un deklarashon ku no ta bèrdat.

Grandi ta nos sopresa ora ku siman pasá den Tweede Kamer, esta parlamento Hulandes señora Bijleveld ta duna deklarashonnan ku ta nèt kontrali na lokual Prome Minister Emily de Jongh Elhage a deklará. Señora Bijleveld a rechasá ku e ley ta for di mesa. Todo lo kontrario! Ela garantisá Tweede Kamer ku minister Hirsch Ballin lo manda e ley rasista aki parlamento pa e ser tratá promé ku dia 10-10-10. Bijleveld a bisa Tweede Kamer ku nan por keda trankil pasó lo bini un ‘terugkeerregeling’ sigur. Tambe ela bisa sorpresivamente ku Hirsch ta kòmbersando ku e islanan di Antias riba e tópko aki. Awor ta ken ta papiando bèrdat òf mihó bisá ta ken ta gaña; Bijleveld of de Jongh Elhage.

Nos ta rechasá kategórikamente ku ta mal informá e pueblo di Kòrsou i ku ta tuma parlamento di Antias i Konseho Insular di Kòrsou hasi. Ta kon por ta posibel ku Hirsch Ballin ta kòmbersando ku islanan di Antias riba un tópiko ku unánimante a rechasá i ku supuestamente ta for di mesa. Sa deliberá riba un kos ku no ta riba mesa mas?!

Pakolmo aya banda Zita Jesus Leito tambe ta basha awa. Zita ta tribi di deklará ku despues di dia 10-10-10 nos mes ta hasi tur nos kosnan. Wel señora Zita pobersito aparentemente no a komprondé e kos ku e mes firma. Ku otro palabra e no a komprondé tampoko e poder ku e mes a duna Hulanda. E pobersito no a komprondé ku lokual ela firma ta nifiká ku pa kualkier kos i ki ora Hulanda haña ta bon e por drenta den nos Pais Kòrsou i tuma desishon riba tur kos. Ku otro palabrá ta 10 luna so falta pa nos drenta den e debakel aki. Un debakel ku pakolmo ta usa plaka di pueblo pa bendé komo un Kòrsou Outónomo. A ni e 52% ku a vota Si no ta kere den ‘gebakken lucht’ mas!

Pueblo ‘ojo’; kampaña a start, pues lus bèrdè pa mentira i manipulashon.

Direktiva Aliansa Patriótiko

Kòrsou,