Aliansa Patriótiko

Hulanda ta sekuestrá Statüt

Un biaha mas Hulanda i su muchanan mandá den gobièrnu di Antias i di Kòrsou ta tuma pueblo di Kòrsou hasi. E biaha aki ta mishi ku Statüt mes. Kontrali na loke polítikonan Hulandes i Polítikonan di Antias i Kòrsou a primintí, Hulanda a proponé pa tòg mishi ku kontenido di nos Statüt. E proposishon aki ta debilitá un di e pilarnan mas importante di e dokumento aki kual ta igualdat di e partnernan den Reino. Nos tur ta kòrda ku na masha hopi okashon a garantisá ku lo no kambia Statüt den su kontenido, sino solamente algun kambio di índole redakshonal tékniko. Awor Hulanda ke bin proponé pa hinka den Statüt ku ora tin diferensha di opinion entre Hulanda, Kòrsou i St.Marten riba konsekuenshanan di eliminashon di Antianan Hulandes desishon final ta kai via di un ‘Koninklijk besluit’ (KB). Ku otro palabra ta gobièrnu Hulandes lo dikta e desishon final vioando di e forma aki igualdat básiko den Reino. Ku e kambio aki nos ta bai bèk den tempu kolonial for di 1634 kaminda tambe desishon di Hulanda riba Kòrsou tabata kai via di KB. Komo sifuera no ta poko Hulanda ta proponé tambe ku si ora Kòrsou no kumpli ku akuerdonan internashonal e lo ta esun ku lo imponé esaki via di un ley di Reino òf un Medida General di Alto Supervishon.

Ku e dos kambionan fundamental aki Hulanda ta sekuestra Statüt i violá e prinsipio básiko di outonomia ku Statüt ta enserá. E kambionan aki ta simplemente un falta di rèspèt di gobièrnu di Hulanda pa ku gobièrnu di Antias, gobièrnu di Kòrsou i pueblo en general. Gobernashon ku ‘Koninklijk Besluit’ ta nada otro ku diktadura kolonial. Pa pasa e desishonnan aki sin nos ripará ta purba lanta un kortina di huma lantando diskushon riba nos akshon pa Stòp Dutch Apartheid. Partido PAR ta manda su mucha mandá ku debe fabor pa hasi uzo di tur tipo di medionan di komunikashon pa ventilá argumentonan fofo i no alkaso kontra di e akshon pa Stòp Dutch Apartheid. E pober muchanan mandá ta lubida ku e akshon ei ta pa sostené un moshon di Staten i Eilandsraad ku tur miembro di partido PAR tambe a sostené. E moshon di Staten ei firmá pa presidente Staten, miembro di PAR, Pedro Atacho a ser mandá asta pa e Komishon Europeo kontra di Rasismo i Intoleransha. Esaki ta nifiká ku PAR i nos parlamentu ta konsiderá e ley di Trafiskashon di Hende di Hirsch Ballin un ley rasista i di Apartheid. Hamas un lucha pa dignidat di un pueblo por perhudiká desaroyo ekonómiko òf di turismo. Al kontrario; tur turista ku den nan pais a logra soberania ku lucha i a logra pa bin ku leynan kontra di rasismo i Apartheid lo apresiá pa bishitá un isla ku ta lucha pa igualdat di hende. Ta mihó paga pasashi pa e muchanan mandá dal un kèiru den Karibe, amplia nan konosementu i mira kon orguyoso nos pueblonan bisiña ta di nan propio identidat. By the way ta islanan ku ta forma parti di destinashonnan lukrativo turístiko tambe. Esmas e biahesito aki lo yuda e muchanan mandá di PAR surpasá nan kompleho di inferioridat.

Un biaha mas ta nèt PAR ku ta boga pa unidat ta lanta divishon den nos mes pueblo. Esaki si ta funesto pa nos turismo i nos desaroyo en general.

Direktiva di Aliansa Patriótiko