Aliansa Patriótiko

Kalidat di enseñansa ta na peliger

Ta hopi ta e reakshonnan ku nos a haña riba nos último komunikado “Kòrsou, Quo Vadis parti 7” den kua nos a analisá situashon den nos enseñansa. Nos a konstatá un gran preokupashon bou di nos maestronan i mayornan debí na e peliger pa ku kalidat di nos enseñansa. Pakolmo e preokupashon aki ta ser kompartí dor di diferente ekspertonan den enseñansa ku ta sigui diariamente e desaroyonan di i den nos enseñansa. E preokupashon di e maestronan, mayornan i ekspertonan a bira mas grandi durante último tempo kaminda deklarashonnan konkreto di minister i diputado di enseñansa ta demostrá ku polítika partidista ta manehá interes di nos enseñansa i pues futuro di nos yunan. E último desaroyonan riba rekapasitashon di maestronan di skol i tambe kursonan kòrtiku pa purá purá forma maestronan di skol, a spanta tur eksperto ku sa kiko ta konsekuensha di esaki pa loke ta kalidat di enseñansa. Esaki mas ku klaro ta preokupando maestronan konsiente i mayornan ku ta responsabel pa ku edukashon di nan yunan. I ku hopi rason!

Ora bo analisá e lokual ta pasando bèrdat tin un maneho polítiko pa akomodá kompinchinan i hasi kapasitashon i rekapasitashon di maestro un instrumento pa hasi kampaña polítiko. Esaki ta enserá ku ta hala un banda tur esnan ku no ta koperá ku e barbaridat aki i na nan lugá ta akomodá hende ku ta dispuesto na hasi loke sea pa puesto i/ò plaka. Mishimentu ku kalidat di nos enseñansa ta un krimen kontra di nos hubentut  i futuro di Kòrsou. A buska, señor Henry Vijber, un konsehero for di Ulanda ku alabes ta amigu polítiko di minister Omayra Leeflang pa bin hasi i deshasí den enseñansa aki na Kòrsou. A prepará esaki dor di duna direktivanan di skol sierto benefisio di outoridat i básikamente a kita influensha di konseheronan di departemento di enseñansa di gobièrnu sentral i servisionan di teritorio insular di Kòrsou ku no ke baila e ritmo di Omayra i Vijber. Na un manera diabóliko ta trata di silensiá tur resistensia di kualkier partner den edukashon. Pa esaki ta uza manipulashonnan manera entre otro akomodá hende den e buró di rekapasitashon di maestro ku salarionan naturlamente ‘nooit gedacht, wel gekregen’. Tur e desaroyonan peligroso aki ta tumando lugá sin konsulta ni konseho di departamentonan i servisionan ofisial di gobièrnunan. Den nos kombersashon ku un kantidat di eksperto riba tereno di enseñansa a bin dilanti nan preokupashon pa ku e manipulashonnan i kosekuenshanan di esaki pa ku kalidat di nos enseñasa. Loke ta pasando aktualmente den enseñansa ta un atake frontal kontra kalidat di nos enseñansa. Esaki ta inaseptabel pa maestronan, pero speshalmente pa mayornan. Mayornan en general ta ketu ahinda pasombra simplemente nan no ta na altura di loke ta pasando, esta ku ta sigui tuma desishonnan ku ta perhudiká enseñansa di nan yunan. Promé a mishi ku prinsipio básiko di derecho internashonal di mucha na momentu ku pa enseñansa primario aki na Kòrsou ta kobra mayornan plaka, anto hopi plaka. Ku esaki a bolbe fortifká diferensha den skolnan abase di entreda i posishon sosial di mayornan. Despues a traspasá e maneho di idioma pa direktivanan di skol i tambe eliminá siklo 3 di enseñansa di fundeshi. Awor ta politisá enseñansa di tal forma ku e ta bira instrumento di polítika partidista menasando kalidat di enseñansa di nos yunan. Nos ta apoyá e mayornan, maestronan i ekspertona ku ta kompilando tur dato nesesario pa asina denunsiá e plannan destruktivo aki ku ta benefisiá un grupito i algun kolaboradó sin eskrúpulo.

Mayornan, maestronan, ekspertonan i pueblo en general sea alerto i keda pendiente, pasó den e próksimo simannan ta hopi kos mas tin ku bai sali na kla entorno situashon den noes enseñansa.

Enseñansa komo wesu di lomba di desaroyo di nos pueblo, pues patrimonio fundamental di nos pais sigur ta un di e aspektonan patriótiko ku nos lo defendé manera leon ta defendé su krionan.

Direktiva di Aliansa Patriótiko