Aliansa Patriótiko

Kòrsou, ‘Quo Vadis’?!

Parti 5

Den kuadro di nos análisis semanal ku Aliansa Patriótiko a bin ta hasi, titulá Kòrsou Quo Vadis tin dos punto mas ku a hala nos atenshon.

Deklarashonnan fuerte di dekano di abogadonan

Durante di e instalashon di huesnan pa korte komun di Antias i Aruba, e dekano di orden di abogado na un manera skèrpi a pone dede riba un situashon peligroso aki na Kòrsou i na Antias. Den su konsepto ‘politikeria’ ku ela yama “vriendjespolitiek” ta un menasa serio pa nos estado di derecho. Ela deklará tambe ku nos estado di derecho ta bou di preshon. Ta pa e motibu aki ela puntra su mes ; “Kuantu pobresa e komunidat aki tin ku soportá, promé ku e bòm eksplotá?!” Deklarashonnan fuerte saliendo for di orden di abogado ku ta bisa ademas ku un estado di derecho, mester tin un parti sosial kaminda tin manera adekuá i sosial pa atendé ku hende grandi, desempleadonan i otronan ku no por sòru pa nan mes. Pues polítika mester hasi eskógonan esensial pa loke ta nos futuro estado di derecho i speshalmente riba tereno sosial ekonómiko. Esaki ta un atake frontal kontra di e situashon aktual, kaminda ta politikeria i promesa polítiko ta dirigí gobernashon.

Mas nombramentu polítiko

Mientras ku e dekano di abogadonan ta kritiká politikeria, djis algun meter mas leu den Fòrti, gobièrnu ta tuma desishon di nombra e èks presidente di ABVO, señor Nacho Ignacio den un nombramentu puramente polítiko. E nobramentu aki a lanta hopi krítika den komunidat pa e manera ku e prosedura a kana. Den prensa e violashon di prosedurá a keda publiká i gobièrnu a keda ketu konfirmando e manipulashon den e prosedura aki. A keda komprobá ku tabata tin un konseho devastador riba e nombramentu i e salario desproporshonal di Nacho. Mesora a pone un amptenar lòs for di su departamentu formulá un konseho nobo i abase di esaki señora Emily de Jongh a logra kumpli e promesa na Nacho. Ku nan rason Fundashon Kòrsou Fuerte i Outónomo ta denominá e proseso aki unu di korupshon. Si un Minister Presidente mes ta manipulá ku proseduranan ta ki konfiansa pueblo lo tin den e Minister Presidente aki i den su gobièrnu. Ademas ta inkreibel ku ta nombra un persona ku ta konsehero di sindikato komo konsehero di gobièrnu. Bo no por sirbi dos Dios pareu. Esaki nos ta yama konflikto di interes i e ta inaseptabel den kualke forma di bon gobernashon. Ta komo sifuera ku aki na Kòrsou tur kos por, basta ta trata di e koalishon di PAR, Nashonal i Frente, ku apoyo di Ulanda. Ta e pagamentu di fabornan aki, e patronage polítiko aki, a pone ku PAR a grita dia nan a gana ku nan ta bai “ruim op de boel”.  “Kòrsou Quo Vadis?!”

Direktiva di Aliansa Patriótiko