Aliansa Patriótiko

Kòrsou, ‘Quo Vadis’?!

Parti 4

Un bia mas Aliansa Patriótiko a analisá e desaroyonan di último simannan den kuadro di nos proseso di emansipashon i ketu bai  nos ta puntra nos mes: “Unda Kòrsou ta bai?” ku otr palabra“Kòrsou Quo Vadis?!”

Sosteniendo posishon fuerte di Staten i Konseho Insular

Siman pasá den un akshon relampago Aliansa Patriótiko a yama atenshon públiko riba e lei diskriminatorio ku Ulanda ta proponiendo. Un konsepto di lei ku ta diskriminá nos hendenan djis pasombra nos no a nase na Ulanda, violando un prinsipio básiko di nashonalidat Ulandes ku tin ankrá den nos Statüt. E akshon a konsentrá riba duna informashon i parti/ pega stiker. Tambe nos a kologá un paña grandi ku e teksto “Stop Dutch Apartheid” ku ta e mesun teksto ku (ta)tin riba e stikernan. E akshon tabata un éksito konsiderando e manera kon públiko tabata interesá den e informashon i e stikernan ku nos tabata parti ku un teksto sumamente fuerte ariba. Remarkabel tabata e falta di informashon serka un kantidat di hende riba kontenido di e lei diskriminatorio aki. Esaki no por otro ya ku nos a konstatá ku miembronan di Staten i miembronan di Konseho Insular no a duna kara sufisiente públikamente ora ta trata puntonan ku ta mishi ku Ulanda. Miembronan di Staten tantu di koalishon komo di oposishon unánimamente a saka un moshon hopi fuerte kontra di e lei diskriminatorio aki. Den e moshon aki na un manera hopi determiná a ekspresá e posishon di Staten. Asta nan a manda e moshon aki pa un gran kantidat di instansha internashonal inkluyendo Nashonnan Uní, Parlatino, Copppal, parlamento Europeo, Konseho di Minister Europeo i e komishon kontra Rasismo i Intoleransha. Den e mesun meshon aki Staten a urgi Minister President Emily de Jongh ku no ta laga duda pa Minister Presidente di Ulanda, rechasando kategórikamente e konsepto di lei diskriminatorio aki. Te awe aparentemente Minister Presidente no a manda nada, faltando respèt pa parlamento Antiano i konfirmando ku nos Staten a para bira “rubberstamp” di Gobièrnu òf di señora de Jongh. E di dos punto di e moshon ta bisa ku Staten lo tuma tur paso nesesario tantu na nivel nashonal komo internashonal pa prevení ku e lei diskriminatorio aki ta ser introdusí. Ta un posishon hopi bon i fuerte i di apoyá, lokual netamente Aliansa Patriótiko a hasi tambe pa medio di e akshon di stiker djamars último. Pero si Staten laga esaki keda na palabra so anto e ora ei si ta politikeria barata. Parlamentarionan mester sali duna kara pa un posishon fuerte i korekto sino e lo para bira simplemente bla, bla, bla. Ta e tipo di kosnan aki ta mina kredibilidat di nos polítikonan i di polítika en general.

Resultado di elekshon na Aruba

Ta un viktoria pa Ulanda i di kapital. Mesora ku e resultado tabata konosí, nos gobièrnu a deklará ku e resultado ta Aruba ta bon pa desaroyo di nos Struktura Estatal. Na promé lugá e deklarashon aki falta tur etika gubernamental. Un deklarashon asina, por ser hasí dor di partidonan/organisashonan polítiko i/ò sosiol, pero hamas na nòmber di un gobièrnu. Esmas e no ta korekto tampoko, pasombra nos tur sa ku e gobièrnu di Aruba balentemente a resistí kontra di rekolonisashon di parti di Ulanda. Nan tabata e kurashi ku nos gobièrnunan no tabata tin. Si nos gobièrnu ta bisa ku awor si nos struktura estatal ta bai kana bon, ta nifiká ku e team di mucha mandá di Ulanda e ser reforsá. Defakto nos gobièrnu di antemano ta bisa ku e gobièrnu nobo di Aruba si lo sa di entregá na Ulanda.

Gobièrnu fuerte di Boneiru

Pero mientras anochi no sera kareda di biná no a kaba. Pasó di un banda Ulanda ta selebrá viktoria na Aruba, na e otro banda e gobièrnu nobo di Boneiru ta tuma un posishon fuerte i patriótiko. Bonieru a bisa Bijleveld: “Ta basta, wanta te ei!”  “Laga nos pueblo disidi via di referèndum!” Bijleveld a sali for di su ròl di mama Teresa i kuminsá sulfurá i menasá. Maske ta asina e bèrdat di Ulanda a sali na kla. Boneiro ta bira propiedat di Ulanda i ta p’esei nan a paga, pues pa tur propiedat di Boneiru bira di Ulanda. “Wel, wel Anke; al is de leugen zo snel, de waarheid achterhaalt haar wel!”

Aliansa Patriótiko ta sostené e posishon fuerte aki di e aktual gobièrnu di Boneiru. No solamente e ta sali na vanguardia di emansipashon di su pueblo, pero tambe e ta un ehèmpel pa nos polítikonan na momentu ku papia di úni pa pueblo i no pa partido.

Posishon di Aliansa Patriótiko

Analisando e desaroyonan aki, Aliansa Patriótiko ta konsiderá ku: “No hay mal ke por bien no venga!” E desaroyonan aki, pa punto negativo ku nan por tin,ta yuda pa lanta e konsenshi di pueblo kontra di dominashon i rekolonisashon. E ta lanta e konsenshi na fabor di e proseso di emansipashon, e konsenshi di libertat, di tuma e rienda den nos mes man, pues di aselerá e proseso di emansipashon ku mester redundá den nos soberania. Soberania ta un derecho inalienabel di pueblo i propiedat di pueblo komo pueblo. E no ta priopiedat di ningun hende, di ningun grupo i di ningun organisashon. Tur pueblo ta pasa e proseso pa yega na e momentu apropiá pa eksigí nan soberania. Dirigentenan por duna un man den e porseso aki, pero hamas por apoderá nan mes di e propiedat di pueblo aki. Resientemente algun èksperto tantu regional komo lokal a aksentuá ku e proseso di soberania mester ta di pueblo i huntu ku pueblo. Tur proseso ku ta divorsiá e pueblo for di e proseso ta forma parti di ego polítiko ku mas bien ta stroba e proseso enbes di yuda pa logra nos soberania. Ta p’esei Aliansa Patriótiko ta sigui boga pa un unidat di tur esnan ku ta kere den e proseso emansipatorio aki, lagando un banda interes polítiko partidista, interes personal i ego polítiko.

Laga nos tuma un ehèmpel di nos kompatriotanan polítiko di Boneiru, pero den tur sentido di palabra. Pasó pa logra e posishon fuerte ku e aktual gobièrnu di Boneiru tin, pa asina guia e pueblo den e direkshon deseá, nan mester a úni promé. Esaki ta redundá den un frase ku ya nos a yega di uza i sigur nos lo sigui uza tambe, kual ta:

“Uní nos lo vense, dividí nos lo hundi!”

Direktiva di Aliansa Patriótiko