Akshon di Aliansa Patriótiko

Apoyando moshon di Staten i Bestuurscollege di Kòrsou

Awe djamars atardi Aliansa Patriótiko ta tene un akshon di pega stiker pa sostené Staten i Eilandsraad di Kòrsou ku unanimamente a rechasá e lei diskriminatorio di Ulanda.

Dia 1 di sèptèmber na un manera klaritu i hopi uní Staten di Antianan Ulandes a rechasá e lei diskriminatorio ku Ulanda a bin kune i a bisa ku bou di ningun sirkunstansia nos pueblo lo aspetá esaki. For di aña pasá, esta dia 14 di febrüari 2008 Staten unanimamente a bisa ku ta inaspetabel ku ta mara e lei aki na kambionan estatal manera artíkulo 22 di e lei aki ke hasi. Ademas Staten na un manera hopi fuerte a formulá ku nan lo tuma tur paso nesesario pa evita esaki. Tantu riba tereno nashonal komo internashonal Staen a buska sosten i apoyo pa prevení ku e lei aki ta drenta na vigor. E posishon fuerte i skèrpi aki di partidonan di koalishon i di oposishon di Antias a ser mandá pa entre otro Nashonnan Uní, Konseho di Minister Europeo, Parlamento di Europa, Parlatino, Copppal i e komishon Europeo kontra Rasismo i Intoleransha.

Pues atraves di e akshon di awe tardi, organisá dor di Aliansa Patriótiko en koperashon ku fundashon Kòrsou Fuerte i Outónomo de fakto nos ta apoyá Staten i Konseho Insular di Kòrsou den e lucha kontra di diskriminashon aki. Awe lo plak stikernan na tur outo ku ta deseá esaki pa na un manera bistoso pueblo di Kòrsou ekspresá nan mes kontra diskriminashon promové dor di Ulanda.

Aliansa Patriótiko un biaha mas ta hasi un yamada na tur partido polítiko ku a sostené e moshon den Staten i den Konseho Insular, tur organisashon sosial ku ta kontra diskriminashon i rasismo i na pueblo en general pa asistí awe tardi for di 5or na krusada di lus di tráfiko na Sta. Maria. Bini i pasa tuma bo stiker i plak esaki riba bo outo. Di e forma aki bo tambe lo laga un i tur mira ku bo tampoko lo aspetá pa Ulanda sigui pretendé ku e lei diskriminatorio aki. Nos gobièrnunan sigur no mag di bira komplisé di un lei ku ta introdusí diskriminashon den Reino Ulandes.

Direktiva di Aliansa Patriótiko