Na:       Staten di Antianan Ulandes

Gobièrnu di Antianan Ulandes

Konseho Insular di Kòrsou

Gobièrnu di Kòrsou

Presente,

Señores,

Ku hopi atenshon Aliansa Patriótiko i pueblo di Kòrsou ta sigui e desaroyonan riba struktura estatal i tur lokual ta relata esaki. Den e kuadro aki nos a tuma nota ku dia 30 di sèptèmber 2009 lo tin un reunion kaminda tantu gobièrnu di Antias komo di Kòrsou i di Ulanda lo ta presente pa papia i tuma desishon riba puntonan importante i asta e fecha riba kua Kòrsou lo drenta un Status nobo.

Den e pakete di dokumentonan ku ta ser tratá tin inkluí e lei diskriminatorio ku un toke rasista ku ta den konsepto i ku ta degradá nos suidadanonan komo suidadano di segundo rango i di e forma aki mishi na un forma diskriminatorio ku un derecho fundamental di nos pueblo. E lei aki ta parti integral di e pakete ya ku den e konsepto di e lei aki, artíkulo 22 ta mara e lei aki integralmente na nos struktura estatal. E konsepto di lei aki a ser formulá unilateralmente sin konsultá i ademas sabiendo ku aki na Kòrsou tin resistensha unánime kontra esaki.

Dia 28 di ougùstùs último Eilandsraad di Kòrsou a manda nan posishon por eskrito na Konseho di Minister di Reino abase di un desishon unánime den Konseho Insular. Pues aki tantu miembronan di koalishon komo miembronan di oposishon na nòmber di pueblo di Kòrsou a manda bisa Ulanda ku e ta “volstrekt onaanvaardbaar”. E karta aki a ser firmá dor di presidente di Konseho Insular kende ta Gezaghebber i mandá pa Konseho di Reino i un kopia a bai na 11 instansha den Reino.

Dia 1 di sèptèmber 2009 Staten di Antianan Ulandes unánimamente a aseptá un moshon riba e konsepto di lei di Reino enkuanto tráfiko di hende. Staten na nòmber di pueblo di Antias Ulandes ta bisa den e moshon ku di ningun manera nan por uni nan mes ku e espiritu, kontenido, meta i konsekueshanan hurídiko di e konsepto di lei aki. Tambe Staten ta bisa ku durante e último añanan repetidamente i unánimamente Staten a ekspresá su mes den moshonnan kontra di kualkier areglo ku tin un tendensia igual. Ademas Staten ta sigui bisa ku na un manera ku no tin duda Staten a pone dilanti ku bou di ningun kondishon por mara e konsepto di lei den e diskushonnan di kambionan estatál manera na e momentunan aki ta ser indiká den artíkulo 22. E argumentashonnan fuerte di Staten aki a redundá den dos desishon:

1. pa pidi Minister President di Antianan Ulandes pa manda bisa Minister President di Ulanda na un manera “ondubbelzinnig” ku e konsepto aki di lei ta inaseptabel.
2. tuma tur paso posibel i nesesario tantu riba nivel nashonal komo nivel internashonal pa evitá introdukshon di e lei di Reino aki.

E moshon aki a ser mandá na kasi 20 instansha ofisial na mundo manera entre otro na Nashonnan Uní, Parlatino, Copppal, Parlamento Europeo, Konseho di Minister Europeo, Komishon Europeo kontra Rasismo i Intoleransha i Open Society Justice Initiative.

Konsiderando e posishon fuerte aki i konsiderando ku a manda e posishon aki na tur instansia na mundo poniendo nan solidaridat nos mes mester sali kumpli ku lokual Staten a disidi esta “alle mogelijke en noodzakkelijke stappen te ondernemen op zowel national als international niveau ter voorkoming van de eventuele invoering van een Rijkswet zoals verwoord in het voren bedoelde gewraakt concept.” Esaki ta enserá ku ta imposibel i ademas inaseptabel pa nos komunidat ku nos gobièrnu ta sinta na mesa ku Ulanda mientras e konsepto di lei diskriminatorio aki te ahinda ta riba mesa. Partisipando na e ‘bestuurlijk overleg’ aki ta nifiká un traishon di nos pueblo pa loke ta nos derechonan fundamental i ademas un outo-burla pa nos organonan estatál di mas haltu ku a manda pidi sosten rònt mundo na momentu ku sinta na mesa ku Ulanda estando e lei aki te ahinda riba mesa.

Abase di e situashon denigrante i di menospresio aki Aliansa Patriótiko ta urgi gobièrnunan pa no sinta na mesa ku Ulanda mientras e konsepto di lei diskriminatorio i humiante aki ta riba mesa.

Nos lo hasi un yamada na pueblo pa keda alerto pa akshoná i sali na defensa di nos derechonan fundamental i humano.

Atentamente,

Na nòmber di direktiva di Aliansa Patriótiko

E.A.Cova                                                                                             E.Joseph

Vise-presidente                                                                                    2do sekretatorio