Asamblea di pueblo ta apoyá unidat polítiko

Ayera tardi djadumingu 13 di sèptèmber 2009 na sede di PLKP a tuma lugá e asamblea di pueblo ku ta reunion general di Aliansa Patriótiko. Den e reunion aki asamblea di pueblo a trata e plan di trabou di Aliansa Patriótiko presentá dor di direktiva. E plan di trabou ta konsistí di dos parti.

E promé parti ta e konsistí di e manera pa sigui fortalesé Aliansa Patriótiko komo organisashon tantu kwalikativamente komo kuantitativamente. E plan aki ta enserá aktivá e regionan i barionan atraves di e Komiténan Patriótiko ku entre tantu a keda a keda instalá. Banda di esei lo kuminsá un mobilisashon kontra di e medidanan di por ehempel subimentu di awa i elektrisidat. Un di e regionnan a keda enkargá pa kuminsa ku e preparashonnan di esaki.

E di dos punto tabata e situashon polítiko ku a trese un diskushon profundo den e asemblea di pueblo. E partisipashon amplio di miembronan den e asamblea a pone ku a yega na un desishon konsiente i unanime. Asamblea di Pueblo ta di opinion ku pa e elekshon benidero no tin margen ni espasio pa politikeria partidista. Ta bai pa e pregunta si nos derecho di outodeterminashon ta ser respetá, pues si nos komo pueblo ta keda pasivamente ta wak kon nos outonomia ta ser kitá for di nos. Defakto ta bai vota riba e echo si e manera e proseso aki ta kanado ta aseptabel si òf no.

Asamblea di pueblo ta di opinion ku mester hasi tur lokual ta posibel pa rechasá e lokual tin riba mesa pa asina Kòrsou logra su status outonomo den Reino pa kontinuá ku e proseso di emansipashon ku finalmente mester yega na soberania di Kòrsou. Pa logra esaki mester tene kuenta ku nos sistema elektoral i ku ekonomia di voto. Analisando esaki a yega na e konklushon ku e úniko opshon ku a sobra ta pa e partidonan ku no ta di akuerdo ku e proseso aktual uni nan mes den un moketa kontra di e gobièrnu i partidonan den koalishon. Nos ta bai vota pa e último Staten di Antianan Ulandes pakolmo ku un durashon korto ku e úniko mandato pa tuma desishon riba Kòrsou outónomo. Aki tampoko tin margen i espasio pa politikeria partidista. Asamblea di pueblo a tuma nota ku tin un proposishon konkreto i detaya aktualmente ku ta hasi e unidat di akshon polítiko aki un realidat. Asamblea di pueblo ta apoyá e inisiativa aki. E úniko opstákulo ku por stroba e prosishon ku ta respirá e deseo di unidat ku ta biba den henter pueblo di Kòrsou, ta ego polítiko, interes personal i/ò interes polítiko partidista.

Asamblea di pueblo tabata hopi fuerte den e asuntu aki, esta ku tur e partidonan ku a papia di unidat awor mester pone nan akshon pa konkretá lokual nan ta propagá. I si lidernan polítiko ta boga tantu pa unidat nan mester sa di duna ehèmpel promé. Asamblea di pueblo a disidí pues no solamente di apoyá e proposishon di unidat, sino tambe sigui ku wowo di falki e desaroyo riba esaki.

Ku outoridat di Asamblea di Pueblo Aliansa Patriótiko lo no basila pa denunsiá públikamente kada un i tur esnan ku abase di argumentonan di interes polítika puramente partidista pa stoba òf boykotiá e unidat di akshon. Den e unidat di akshon aki tin espasio pa kada partido ku ta oponé e proseso d rekolonisashon aki, profilá abase di nan propio prinsipionan i ribanan mes estilo i serka nan propio hendenan. Tur ku dòs plaka di sintí i ku sa kon nos sistema elektoral ta funshoná ta hopi bon konsiente ku si nan no pone di nan parti pa e unidat logra defakto e ta koperando pa e gobièrnu di ‘Dal Bai’ keda na poder i sigui ku e proseso di bendementu di nos derecho sagrado pa komo un pueblo digno sigui emansipá. Unanimamente Asamblea di pueblo a aprobá e posishon fuerte i determiná aki i a enkargá direktiva di Aliansa Patriótiko pa bosiferá esaki públikamente.

Pues Aliansa Patriótiko ta urgi tur partido ku ta kontra di rekolonisashon di Kòrsou pa pone tur diferensha un banda pa e interes fundamental di pueblo di Kòrsou ku ta e derecho di outodeterminashon den e proseso di emasipashon di e pueblo di Kòrsou.

Direktiva di Aliansa Patriótiko