27/07/2009

Kòrsou, ‘Quo Vadis’?!

Un análisis krítiko i profundo

Un biaha mas por konstatá ku Aliansa Patriótiko lamentablemente ta haña rason. Dikon?

Durante kampaña pa referèndum Aliansa Patriótiko a alertá ku ora SI gana lo bini un konfushon ku ta krea mas bien kaos na lugá di stabilidat. 52% a vota SI di kual ya un kantidat a bai bèk Ulanda. Nan tabata pasahero na Kòrsou, a duna nan chèns di vota i awor nan ta bèk na nan país. Na e pueblo ku si mester karga tur konsekuensha a priminití stabilidat, bienestar, trabou, salubridat, bon enseñansa, oumento di penshun, enfin a primintí un kantidat di kos, te asta a laga plaka lora i 52% a kai den esaki.

Awe nos ta mas o menos 2 luna i mèi despues di e referèndum. Kiko ta susediendo i unda nos ta pará awe?

Struktura estatal

Pa loke ta struktura estatal nos ta mira ku e lokual a firma dia 15 di desèmber 2008 ta parti di e maniobra di Ulanda huntu ku su marionetanan aki na Kòrsou pa hasi nos un kolonia. Esta rekolonisá nos bèk. Defakto kita Statüt for di riba mesa. Asta un parlamentario den Tweede Kamer ku ta un èks minister di asuntunan Antiano a bisa ku ta inaseptabel ku nos por tin un status di igualdat ku Ulanda den Reino. Esaki ta un rechaso fundamental di esensia di nos Statüt. Awor ta resultá ku ke kita mas outoridat for di Kòrsou ku ya kaba e 52% a entregá i pone esakinan tambe den man di Ulanda atrabes di gobernadó. Pakolmo ta pone sabinan bin splika ku mester posponé elekshon. Posponementu di nos elekshon no solamente ta violá nos konstitushon, pero tambe e ta un akto di diktadura. Ta alargá un gobièrnu su periodo sin aprobashon i konsulta di pueblo. UN GOLPI DI ESTADO! Ta esaki ta e bienestar ku 52% a votá i boga pe?

E ponementu di mas outoridat den man di Ulanda fuera di e loke ku 52% ya a entregá ta fortalesé aun mas e rekolonisashon di Kòrsou. Un kos so falta; eliminá elekshon por kompletu i deklará gobièrnu Ulandes komo gobièrnu di Kòrsou. Ta esaki ta e bienestar ku 52% a votá i boga pe?

Relashon den Reino

E arogansia di Ulanda i nan polítikonan ta sigui krese. Awor promé minister di Antias, señora Bijleveld, ta bai parlamento di Ulanda komo sekretario di estado di Ulanda pa duna kuenta i rason riba NOS refineria, esta refineria di Kòrsou. Ulanda no tin ni arte ni parte, ni outoridat riba nos refineria. Esaki nan a respetá for di aña ’85 kabalmente te ora a bin un gobièrnu den Forti i na Scharlo ku ta ser mové ku remote kontròl for di Den Haag. Públikamente sekretario di estado, minister di asuntunan eksterior i aparentemente promé minister di Antias ta papia riba nos refeineria komo sifuera ku e refineria ta situá na Den Haag, Groningen òf Lutjebroek. INSOLITO! Ta Ulanda ke disidí awor riba nos refineria, despues ku Koninklijke Shell di Ulanda ku tabata tin e refineria a bai laga nos na ’85 pasó nan no tabata tin sufisiente ganashi, lagando atras un polushon praktikamente ireversibel. Nos ta di akuerdo ku mester stòp e polushon. Loke nos ta kontra i hamas lo aseptá ta ku ta uza e asuntu di polushon aki pa Ulanda awor bin disidí riba nos refineria. Un polushon ku Ulanda mes a yuda krea. Kisas Ulanda ta interesá den e refineria debí ku tin krudo den nos awa teritorial i pa e motibu aki ke saka PDVSA pa nan mes drenta?! Estilo di “ kita te tú pa ponerme yó?” Ta esaki ta e bienestar ku 52% a votá i boga pe?

Nos ekonomia

Di otro banda ke tapa desaroyo ekonómiko ku manipulashon di sifra. A subi prèis di kombustibel haltisimo pa motibu di subimentu di krudo riba merkado internashonal. Konsekuensha ta ku prèis di tur artíkulo di primera nesesidat a subi ‘sky high’. A primintí kolchon sosial; NADA! Despues prèis di krudo riba merkado internashonal a basha bou. Ela kai te bou di mitar di loke e tabata ta. Aki na Kòrsou niun prèis no a baha. A anunsiá ku yen di fanfara ku ta bai baha prèis di awa i koriente. A kòmbersá, kòmbersa i e resultado ta ku prèis di kombustibel aki na Kòrsou ta bolbe subi. Pakolmo ta bai subi awa, koriente i telefòn tambe. Tur kaminda na mundu krudo ta baha, aki na Kòrsou so prèisnan ta subi pa motibu di e mesun krudo aki. Ta kòrta elektrisidat di hotel i di skolnan i e kosto di hasi negoshi (cost of doing business) ta sigui subi menasando nos ekonomia. Ta esaki ta e bienestar ku 52% a votá i boga pe?

Situashon sosial

Di e otro banda sektor laboral ta inkietá. Trahadónan ta eksigí di nan sindikato posishon fuerte pa loke ta nan ‘indexering’ i nan kontrato kolektivo. Trahadónan ta fòrsa nan sindikato tuma akshon, kibrando e teoria estúpido di diálogo sin desishon. Ta surgiendo.

wèlga tras di wèlga. Penshonadonan ta desesperá. Riba dia di penshonado djasabra último via korant penshonado ta haña un abraso di promé minister, pero ‘de aquello’, NADA. Akaso ku abraso di promé minister SI por bai supermerkado?! Pa trahadó kende ta esnan ku ta traha, mes e sèn no ta yega, ban kòrda pa e penshonado, e ama di kas i e kobradó di ‘onderstand’. Ta esaki ta e bienestar ku 52% a votá i boga pe?

Pobresa

Situashon di pobresa ku masha tempu ‘tin atenshon’ di Kòrsou, Antias i Ulanda. Resultado basá riba e sifranan saká for di un karta notisiero na Ulandes ta papia pa nan mes.

Enseñansa i salubridat

Un karakterístika di kaos gubernamental den kualke país ta un deterioro òf falta kompletu di un maneho riba fundamento di desaroyo di un pueblo ku ta su enseñansa i salubridat. Deklarashonnan, desishonnan i akshonnan di esnan responsabel pa enseñansa i salubridat ta indiká klaramente ku tin un falta di konosementu i un inkapasidat kompletu pa desaroyá un maneho koherente riba e dos aspektonan sosial i fundamental di desaroyo aki. Visibelmente sektor di enseñansa i di kuido médiko ta bayendo atras ku stapnan grandi. Mayornan ta papi’é, pashèntnan ta sintié, maestronan ta komenté, profeshonalnan den salubridat ta grité. E únikonan ku no ke miré ta esnan responsabel pa e karteranan aki. Nan ta bashando awa ketu bai. Ku kara harí i públikamente nan ta duna deklarashonan sin base riba e dos terenonan aki ku ta pone profeshonalnan den e sektornan aki kremp di bèrguensa, rabia i prekupashon. Ta esaki ta e bienestar ku 52% a votá i boga pe?

Dolarisashon

Na lugá di enfrentá e situashon ekonómiko ta manipulá sifra i hasi komo sifuera ku kos ta bai bon. Kura di tur malesa ta kuminsa ku rekonosementu di e malesa i no skondementu di esaki. Pakolmo for di ‘right field’ presidente di Banko Sentral ta lansa un ‘fastball’ di dolarisashon. Presidente di Banko Sentral ku tin komo tarea pa kuida nos florin, awor ke tira esaki afó, peligrando e mesun florin ku e tin di kuida i alabes destabilisá nos ekonomia. Responsabilidat di nos florin ta di gobièrnu. Gobièrnu ta outorisá presidente di Banko Sentral pa kuida nos florin i wak pa no peligrá esaki. Na lugá di esaki, presidente di Banko Sentral ta surpasá su outoridat i proponé pa tira nos florin afó i bin ku dollar merikano. Esun ku ta responsabel kende ta minster di finansas mes no ta na altura i ta bisa públikamente ku e lo pidi presidente pa duna un presentashon na gobièrnu. Ta ken ta gobernando anto?! E mesun Banko Sentral ku algun aña pasá a nombra un komishon pa studia dolarisashon a yega na un konklushon hopi kla ku esei no ta kumbini Kòrsou. Ta kiko a kambia?! Ta kon un Banko Sentral prestigioso por kambia di opninion sin mas?! E ekspertonan di Banko Sentral a ser tendé e biaha aki òf ta presidente di Banko Sentral ta hasi i deshasí pa loke ta nos moneda?! Ta unda nos parlamento a keda?! Ta unda nos minister di finansas a keda?! Ta unda nos diputado di finansas Willem ‘de zwijger’ a keda?! Ta asinaki tin idea di fortalesé i kuida nos florin?! Of mas bien ke debilitá nos moneda i defakto nos ekonomia tambe?! Ta esaki ta e bienestar ku 52% a votá i boga pe?

Nos situashon geopolítiko

Mientras ku internamente nos ta kayendo den un kaos di gobernashon, desaroyonan internashonal en general i den nos region en partikular ku tin konsekuensha pa nos tambe, remarkabelmente nos gobièrnunan no ta ni hisa kara waknan. Ta dikon?

Den e kuadro geopolítiko, merka ta dominá Ulanda totalmente. Hamas den último dekadanan Ulanda tabata un ‘schoot hondje’ di merka manera e ta aktualmente. Balkenende ta konsiderá un reunion di 15 minüt ku Obama òf Bush un logro masha grandi den su gobernashon (SIC). Esaki ta pone ku e relashon di dominio di Ulanda riba nos i pa loke ta nos relashon den region ta ser diktá dor di Washington. E desaroyonan den nos region a pone ku e maskaranan tur ta kayendo “Uno por uno.” Merka tin problema ku Chavez- Ulanda tin problema ku Chavez; konsekuensha; nos relashon ku Venezuela ta dañá. Merka ke mas kontròl den Karibe- Ulanda ta ehekutá esaki riba Antias, Aruba i Kòrsou. Merka ta sostené Plan Colombia- Ulanda ta sostené Plan Colombia. Golpe di estado na Honduras; Merka ta keda prudente- Ulanda ta keda ketu. RIBA ORDU!

Ta opvio ku tin prekupashon serka Merka pa e desaroyo popular na Amerika Latina. Pueblonan di Amerika Latina ta skohiendo gobièrnunan ku no ta mucha mandá di Merka. Merka a plania banda di e base FOL na Kòrsou pa pone mas base militar na Colombia pa vigilá Chavez. Ulanda ta sera man riba outonomia di Kòrsou pa nos no skit aki den nos region. Relashon di Willemstad ku Caracas ta via Den Haag, perhudikando barbaramente nos desaroyo ekonómiko i geopolítiko. Nos no mester lubidá ku e konsekuenshanan di desaroyo geopolítiko ta nos ta kargé i no Ulanda ni Merka. Ta esaki ta e bienestar ku 52% a votá i boga pe?

Posishon di Aliansa Patriótiko

Esakinan ta djis algun di e desaroyonan ku ta tumando lugá den e 2 luna i mèi despues di e referèndum. Aki nos ta papiando solamente di e tòp di e ‘ijsberg’. Konsiderando e kaminda ku e gobièrnu di mucha mandá di Ulanda aki ta hibando nos pueblo, ta un deber di tur patriota konsiente pa lanta i para e violashon kontra nos derechi di emansipashon. No por laga un grupito di bende patria hiba henter un pueblo rumbo plenchi.

Aliansa Patriótiko en todo kaso lo no aseptá esaki bou di ningun sirkunstansha. Ta p’esei nos ta preparando akshonan pa kontrarestá i sigui resisti e opreshon aki. Nos ta hañando ehèmpel di e pueblo humilde di Honduras ku a lanta pa su derecho demokrátiko. E di tres pueblo mas pober na Latino Amerika, ku ta Honduras, a disidí di pone prinsipio i dignidat dilanti i subi kaya pa lucha. Tur pueblo tin e kapasidat di lanta i lucha pa e prinsipio básiko di outodeterminashon. E pueblo di Kòrsou lo no ta un esepshon.

“You can fool some people some time, you can fool all the people some time, you can fool some people all the time, but you can’t fool all the people all the time.’

Direktiva di Aliansa Patriótiko

Kòrsou, 26 di yüli 2009

Algun sifra saká voor di un karta notisiero na Ulandes:

Cijfers...

33%

Uit recent onderzoek van het CBS

van de Nederlandse Antillen is duidelijk

geworden dat 33% van alle

huishoudens op Curaçao onder de

armoedegrens leeft.

20%

20% van de bevolking verdient