Glen Sulvaran “of all poeple” ta papia di mal informá pueblo

“HET KAN VERKEREN”

E mucha mandá di tanchi mè a haña òrdu pa sigui ku su racha di manipulashon, pero pa e biaha aki ataká Aliansa Patriótiko. Siman pasá e mesun Glen Sulvaran aki a kue sifranan ku Banko Sentral a publiká i ela traha un ‘ratjetoe’ ku esakinan pa kueste loke kueste defendé e mal maneho di PAR.

Ayera Glen Sulvaran tabata tin e osadia di reakshoná riba Aliansa Patriótiko demostrando na promé luga ku e no sa lesa i na di dos luga ku e no ta konsekuente, kontradisiendo su barbaramente. E ta kontradesí su mes na momentu ku e ta hasi komo sifuera e no sa ta ken ta e miembronan di direktiva di Aliansa Patriótiko, mientras ku den e mesun komunikado e ta skibi ku tin un miembro prominente di partido MAN den direktiva di Aliansa Patriótiko. “Over dom gesproken.”

Glen Sulvaran no a gusta ku nos a yama Joost Pronk un di e prominentenan ku a promové PAR i PAR su kampaña di SI. “Señor Sulvaran dat is een waarheid als een koe!” Awor si bo ta lagé kai pasó nan a kue sera ta straño, paso e no ta promé prominente di PAR ku nan a kue sera i sigur no delaster, basta nos hustisia sigui promové i no keda hustisia di klase.

Den e kaso aki a kue un prominente di PAR riba akusashon di kontrabando i abuzu di para. Si bai chèk habuzu di hende manera por ehèmpel abuzu di e klase trahadó i di e pueblo di Kòrsou en general ta sigur ku algun prominente mas di PAR lo kai será.

E hipokresia di mas grandi di Glen Sulvaran ta na momentu ku e ta duna e kuríkulo polítiko di Joost Pronk. Ta pa e motibu aki hustamente e ta un prominente di PAR.

Pasó si nos komparé ku e kuríkulo polítiko di señor Glen Sulvaran mes no tin hopi diferensha. Alomenos Pronk por a bai otro partido i despues bin bèk pa sostené e partido di kapital. Glen Sulvaran pa interes i pa inkapasidat no por a bai niun otro kaminda. Ta p’esei ela gradua komo mucha mandá di tanchi mè, tapá ku un título bunita di ‘Presidente’(entre komias).

Pues bèrdat ta ku un prominente mas di PAR i su kampaña di SI a kai será. Pronk mester tabata sa ku e partido di PAR ora no ta kumbiní nan mas ta laga bo kai manera patia ‘hel’. Stòp di balotá e pueblo di Kòrsou, paso te asta Pronk a realisá ku e ‘D’ di e pueblo di Kòrsou no ta di ‘Dom’, pero sigur e no ta di ‘Dief’, sino di ‘Digno’ i ‘Determiná’.

‘By the way’ tur nos komunikadonan, banda di ser firmá na nòmber di direktiva nos ta pone nòmber di e persona di kontakto. Esmas te asta Glen Sulvaran sa ken ta e miembronan di direktiva di Aliansa Patriótiko. Un bes mas nos ta haña nos ta sita Multatuli: “Het kan verkeren”

Direktiva di Aliansa Patriótiko

Kòrsou, 21 di yüli 2009