Resolushon Kumbre Internashonal

“Di Outonomia Real pa Soberania”

Aliansa Patriótiko, Fundashon Kòrsou Fuerte i Outónomo i Fundashon Desaroyo Popular, reuní den kumbre internashonal “Di Outonomia Real pa Soberania”

dia 15, 16 i 17 di yanüari 2010 na WTC, Korsou:

Konsiderando ku:

1. den referèndem di dia 8 di aprel 2005, hasiendo uso di su derecho di outodeterminashon, 68% di pueblo di Korsou a vota pa bira un pais outónomo den Reino Ulandes;
2. definishon duna na pueblo di e estado konstitushonal outonomo den reino ta, ku e lo ta igual na e estado konstitushonal optené pa Aruba na 1986 (komo pais outonomo den Reino) i na e estado konstitushonal aktual di   Antia Ulandes;
3. e desishon aki di pueblo ta  ekspreshon liber di e derechi di outodeterminashon di un pueblo pa definí den pleno libertat su estado konstitushonal; derechi fórmula den Karta Magna di Nashonnan Uni , Kapítulo 11 artíkulo 73;
4. dia 2 di novèmber 2006 bou di hopi preshon di gobiernu di Ulanda, gobièrnu di Kòrsou a firma un akuerdo ku gobièrnu Ulandes, riba estado konstitushonal di Kòrsou “Deklarashon Final”, den kua ta kondishoná e derechi di outodeterminashon liber na situashon finansiero di Kòrsou i traspasá podernan hudisial i finansiero pa gobièrnu di reino (gobiernu di Ulanda) a kambio di saneamentu di debe i ta ankra e traspaso aki den leinan di reino Ulandes;
5. e kondishonnan bou di kual a tuma e desishonnan ariba menshona, a kontaminá e proseso di struktura estatal di moda ku no por papia di boluntat propio sino chantahe i ku e proseso a resultá den violashon flagrante di derechi di outodeterminashon i di múltiple derechi internashonal ku ta kompaña e proseso di dekolonisashon;
6. e proseso di dekolonisashon di e manera ei a resultá un proseso di rekolonisashon sin presedente;
7. e proseso aki a konosé resistensha konsistente, kontinuo i fuerte di partidonan polítiko i siudadanonan yunan di Kòrsou; esaki ta keda klaramente refleha den  48% di e pueblo ku a rechasa e akuerdonan ariba menshona den referendum di dia 15 di mei 2009;
8. ta reiterá i konfirma resolushonnan tuma pa COPPPAL pa sostené e lucha anti-kolonial aki.(Aruba 2006, Kòrsou mart 2007, Panamá 2008 , Argentina 2009 , Repúblika Dominikano 2009);
9. ta re-afirma e resolushon di COPPPAL i Aliansa Patriótiko akseptá den e di XXVll reunion plenario di COPPPAL na Panamá, 19 di aprel 2008 i den e reunion di COPPPAL na òktober 2009 na Repúblika Dominikano. Na Panamá  COPPPAL a disidí di hasi dekolonisashon di Kòrsou e di kuater proyekto permanente i duna tur sosten na Aliansa Patriótiko. Na Republika Dominikano a tuma e desishon pa apoya e kumbre Internashonal 2010 di Aliansa Patriotiko;
10. Aliansa Patriótiko ta re-afirma su rechaso di e akuerdonan firma i su kompromiso pa no sosegá te ora ku esakinan kita for di mesa i Kòrsou kana e kaminda di OUTONOMIA berdadero manera pueblo a disidí den e referèndem di aprel 2005;

Ta konkluí:

ku ta imperativo pa intensifiká e lucha pa un outonomia real riba nivel internashonal hasiendo uso di e derechi internashonal i apelashon riba komishon di dekolonisashon i Asamblea General di Nashonnan Uni pa reevalua e proseso legal di dekolonisashon di Kòrsou. Pa logra esaki, lo entamá kontaktonan riba un base struktural ku Komité di Deskolonisashon di Nashonnan Uni;

Ta disidi:

1. pa fortalese i amplia e base di sosten internashonal na paisnan di Amerika Latina i Asia;

2. pa riba proposishon di COPPPAL, COPPPAL huntu ku Aliansa Patriótiko organisá pafó di Kòrsou  riba un tèrmino mas kòrtiku posibel un reunion  internashonal dediká na e proseso di dekolonisashon di Kòrsou;

3. pa tene manifestashonnan den paisnan  ku ta sostené e lucha di Korsou pa un outonomia real;

4. pa insistí ku ta revisá e proseso aktual di e supuesto dekolonisashon di Antia Ulandes, en partikular e proseso di kambio konstitushonal di Kòrsou den kuadro di Karta Magna di Nashonnan Uní (Kapitulo 11 Artíkulo 73), Tratado Internashonal pa Derechonan  Sivil, Politiko i Tratado Internashonal Ekonomiko, Sosial i Kultural, Resolushon 945 di aña 1955 i Resolushon 1514 di aña 1960, p’asina determina si e proseso di restrukturashon konstitushonal ta un proseso di rekolonisashon di Kòrsou i si tin violashon di leinan internashonal, tratadonan i resolushonnan di Asamblea General di Nashonnan Uni di parti di Ulanda;

5. di konkreta e proposishon di COPPPAL pa organisa formashon politiko pa Korsou;

I ta pasa pa orden di dia.

Na nomber di Kumbre Internashonal “Di Outonomia Real pa Soberania”.

Presidente di Presidio di Kumbre